दुसऱ्या महायुद्धातील धुरंधर व्यक्ती आणि कथा

दुसऱ्या महायुद्धातील धुरंधर व्यक्ती आणि कथा ..डॉ. श्रीकांत मुंदरगी 

अजब डिष्ट्रीब्युटर्स

 दुसरे महायुद्ध म्हणजे इतिहासातील सर्वात मोठी घटना.अजूनही या घटनेवर अनेक पुस्तके लिहिली जातात तर अनेक चित्रपट ही निघाले आहेत.

या महायुद्धाचा जनक हिटलर हा इतिहासात सर्वात मोठा क्रूरकर्मा ठरला . पुस्तकात आठ कथा आहेत . यात पहिल्या कथेत हिटलरची माहिती आणि त्याचे अखेरचे क्षण याचे वर्णन केले आहे.

दुसऱ्या कथेत हिटलरने अमेरिकेत गुप्तहेर घुसवून महत्वाच्या ठिकाणी बॉम्बस्फोट घडविण्याची योजना कशी फसली याची रंजक माहिती आहे .

तर मुसोलिनीची सुटका ही अतिशय रोमहर्षक घटना तिसऱ्या कथेत आहे.

याशिवाय लाखो ज्यूचे प्राण घेणारा क्रूरकर्मा आईशमन .तसेच लाखोंचे प्राण वाचविणारा डॉ.क्रेस्टन यांच्या कथा आहेत.

रॅम्बो..5 लास्ट ब्लड

रॅम्बो..5  लास्ट ब्लड 

रॅम्बो सिरीजमधील कदाचित हा अखेरचा चित्रपट. म्हणूनच लास्ट ब्लड हे नाव दिल असावे.

पहिल्या चार भागापेक्षा पूर्ण वेगळा असा हा चित्रपट . सैन्यात सर्वात घातक आणि एकटा कामगिरी करणारा जॉन रॅम्बो आता थकलाय. त्याच्या हालचाली मंद झाल्यात. पण तरीही त्याची बुद्धी अजूनही शार्प आहे . आतापर्यंत त्याने अनेक कठीण कामगिऱ्या एकट्यानेच पार पाडल्या आहेत.

फर्स्ट ब्लडमध्ये जरी तो शांत दिसत होता तरी त्याच्या डोळ्यात आग होती . पण आता तो आपल्या रॅम्बो इस्टेटमध्ये सुखी समाधानी आयुष्य जगतोय . 

त्याच्या आधीच्या चारही भागात भरपूर ऍक्शन होती . फर्स्ट ब्लड आणि रॅम्बोमध्ये तर दर तीन मिनिटानंतर ऍक्शन हाणामारी होती . पण काळानुसार ती कमी होत गेली.

स्टॅलोनने स्वतःचे वय मान्य केले असावे . त्यामुळे या भागात फार कमी ऍक्शन आहे . आधी काही मिनिटे चित्रपट खूप संथ आहे . काय कथा असेल याचा अंदाज येत नाही . पण नंतर मुख्य कथा सुरू झाल्यानंतर चित्रपट वेग घेतो . 

हा एक सूडपट आहे . मेक्सिको येथील ड्रगआणि मुली सप्लाय करणारा  माफिया जो त्याच्या आयुष्यात वादळ  आणतो  आणि रॅम्बो त्याला अतिशय क्रूरपणे संपवितो.

यावेळी त्याला आपल्या शक्तीची पूर्ण कल्पना आहे. म्हणूनच तो  त्याच्या विभागात न जाता आपल्या इस्टेटमध्ये खेचून आणतो आणि ठार मारतो . रॅम्बो गौरीला युद्धात एक्सपर्ट आहे त्यामुळे इस्टेटमधील भुयारात जे काही सापळे तयार करतो ते बघण्यासारखे आहे .

यात  मुख्य खलनायकाची तो अतिशय क्रूरपणे हत्या करतो . ते कदाचित जॉन रॅम्बोच्या स्वभावाविरुद्ध असावे . शेवटी कुटुंबावर किंवा स्वतःच्या प्रेमाच्या व्यक्तींसाठी माणूस कुठल्या थराला जाऊ शकतो हेच दिग्दर्शकाला दाखवायचे असेल .

एकूण रॅम्बोप्रेमींना हा चित्रपट फारसा आवडणार नाही .

© श्री. किरण बोरकर

एन्जल्स अँड डेमन्स...डॅन ब्राऊन

एन्जल्स अँड डेमन्स...डॅन ब्राऊन 

अनुवाद....बाळ भागवत 

मेहता पब्लिकेशन

स्वित्झर्लंड येथे सर्न नावाच्या संशोधनकेंद्रात नेहमीच वेगवेगळे संशोधन चालू असते . त्यात त्यांना प्रतिवस्तूचे अर्थात अँटीमॅटरचे काही कण बनविण्यात यश आले आहे .या प्रतिवस्तूच्या एका कणातून संपूर्ण शहराला वीजपुरवठा होईल इतकी ताकद आहे . त्यामध्ये कोणतेही प्रदूषण नाही ,किरणोत्सर्ग नाही . पण जर ते हवेच्या किंवा इतर कश्याच्याही संपर्कात आले तर त्याच्या प्रचंड स्फोट होऊ शकतो .

पदार्थविज्ञान शास्त्रज्ञ लिओनार्दो वेत्रा याने प्रतिवस्तूचा शोध लावला आणि तीच प्रतिवस्तू आज सर्नच्या संशोधनकेंद्रातून चोरीला गेली. इतकेच नव्हे तर चोराने लिओनार्दो वेंत्राला क्रूरपणे ठार मारले होते .जाताजाता खुन्याने त्याच्या छातीवर इल्युमिनाटीचा प्रसिद्ध सिम्बॉल उमटवला .

सन १५०० च्या आसपास काहीजण चर्चच्या विरोधात उभे राहिले.त्यात बहुसंख्य शास्त्रज्ञ होते .त्यांनी चर्चच्या खोट्या शिकवणूकी विरुद्ध आवाज उठवला . यात काही खगोलशास्त्रज्ञ होते काही गणितज्ञ होते. चर्चच्या खोट्या विचारसरणीमुळे ज्ञानाचा लोप होईल अशी त्यांना भीती वाटू लागली . मग त्यांनी एक गट स्थापन केला .या गटाने स्वतःला इल्यूमिनाटी म्हणवून घ्यायला सुरुवात केली . गॅलिलिओ न्यूटन सारखे शास्त्रज्ञ यात होते. कॅथलिक चर्च त्यांच्यामागे लागले . त्यांनी गॅलिलिओ ला अटक केली .

सर्नच्या डायरेक्टरने तो सिम्बॉल पहातच सुप्रसिद्ध पुरातन अंकचिन्ह लिपी प्राध्यापक रॉबर्ट लँग्डनला बोलावले . आता त्याला आणि वेत्राची मुलगी व्हिक्टोरिया त्या प्रतिवस्तूचा शोध घ्यायचा आहे .

व्हॅटिकन सिटीत आज एक महत्वाची घटना घडणार आहे . पंधरा दिवसांपूर्वी पोपचा मृत्यू झालाय आणि नवीन पोपची निवड आज होणार आहे . पण पोपच्या शर्यतीत असणारे चार कार्डिनल अचानक नाहीसे झालेत . वेत्राचा खून करणाऱ्या मारेकऱ्यांनेच त्यांना पळवून नेलेय. बीबीसीला फोन करून त्याने त्यांची सार्वजनिक ठिकाणी हत्या होणार असे घोषित केले. ही सार्वजनिक ठिकाणे शोधण्याची जबाबदारी रॉबर्ट लँग्डनने घेतली .

गॅलिलिओने  तुरुंगात असताना एक पुस्तक लिहिले होते त्यात पाथ ऑफ इल्युमिनेशन बनवला होता . त्यासाठी त्याने व्हॅटिकनच्या सुप्रसिद्ध शिल्पांचा चतुराईने वापर केला होता . त्यात पृथ्वी ,वायू ,अग्नी ,जल यागोष्टींचा समावेश होता . याशिवाय ती प्रतिवस्तूही व्हॅटिकनमध्येच लपविली होती . आपल्या अभ्यासाच्या आणि बुद्धिमत्तेच्या जोरावर रॉबर्ट लँग्डन त्यांना शोधून काढले का ...?? प्रतिवस्तूचा स्फोट थांबवून व्हॅटिकनला वाचवू शकेल ....?? एक वेगवान , थरारक ,कादंबरी .

धागे ... गुलजार

धागे....गुलजार 

संपादन....अनंत दीक्षित 

मेहता पब्लिकेशन 

सकाळ वृत्तपत्रासाठी गुलजार यांनी वर्षभर  स्तंभ लेखन केले.अनंत दीक्षित यांनी त्याचे संपादन केले .

हे आठवणींचे धागे आहेत . एक संवेदनशील कलाकार आपल्या जीवनातील  आठवणींचे धागे कसे विणतो .हे वाचण्यासारखे आहे.

कधी सरळ ...तर गुंतागुंतीचे .....आपले मन ..विचार ,इतरांबद्दलच्या भावना गुलजार यांनी मोकळेपणाने व्यक्त केल्यात .

 त्या मुलांची आठवण ठेवा मध्ये त्यांनी 26 जानेवारीला गुजरातमध्ये झालेल्या भूकंपाचे भीषण चित्र उभे केले आहे . नैसर्गिक आपत्ती आणि त्यांना होणाऱ्या मदतीवर  त्यांच्या पुनर्वसनावर विचार मांडले आहेत.

 कवितेची रुजवात मध्ये कविता कशी जन्माला येते याची सहज सोप्या पद्धतीत माहिती दिली आहे .

 स्वतःला कसे शोधतो ते आत्मशोधाच्या वाटेवर  सांगितले आहे .

गालिब आणि इतर शायर ,कुसुमाग्रज ,पु. ल. बद्दल त्यांनी दाखविलेला आदर पाहून आपण थक्क होतो . माणूस दुसऱ्यांचा आदर करतो तेव्हाच तो एका उंचीवर जातो हे त्यांनी आपल्या सहवासात आलेल्या व्यक्तींबद्दल लिहून सिद्ध केले आहे .

भ्रष्टाचाराविषयी ते पोटतिडकीने लिहितात . दहशतवादी शेतातून उगवत नाही तर ते आपणच निर्माण करतो .

पावसाची विविध रूपे त्यांच्याकडूनच ऐकवीत .  ते लिहितात पावसाची आगेकूच एखाद्या लष्करासारखी होते . ते इशारा देतात.. त्या काळात पक्षीही आपले घरटे सुरक्षित ठेवतात. शेतकरी शेतीची कामे सुरू करतो. ते पावसाला विविध उपमा देतात .कधी झाड  तर डोंगरावरून वेगळ्या प्रवाहात वाहणारे दोन मित्र . पावसाची रूपे ही विविध आहेत . एक पाऊस चौकशी करायला येतो . परिस्थितीची पाहणी करून जातो .तर एक पाऊस रागावलेला असतो तो कोणाचा मुलाहिजा ठेवत नाही .

खरेच हे गुंतलेले आठवणींचे धागे आपण  वाचून सोडवायला हवे .

राख

#CinemaGully

#raakh

#राख

हू इज अमीर खान...?? आस्क  द गर्ल्स टू नेक्स्ट डोअर... आणि डोळ्यावर काळा गॉगल ,ब्लॅक जॅकेट घातलेल्या कोवळ्या हिरोचे सहा फुटी पोस्टर प्रत्येक नाक्यानाक्यावर  लागले.

१ मार्च १९८८ रोजी कयामत से कयामत तक  रिलीज झाला आणि अपेक्षेप्रमाणे सुपरहिट झाला आणि अमीरखान तरुणींच्या गळ्यातील ताईत बनला.

 आता या चॉकलेटी हिरोचे असेच चित्रपट पाहायला मिळणार अश्याच अपेक्षेने सर्वजण त्याच्या पुढील चित्रपटाची वाट पाहू लागले . पण त्याचा पुढील चित्रपट मात्र तरुणाईला धक्का देणारा होता . 

२१ एप्रिल १९८९ साली त्याचा राख पडद्यावर आला आणि हे पाणी वेगळेच आहे याची जाणीव सर्वांना झाली.

आदित्य भट्टाचार्यने दिग्दर्शित केलेल्या या थ्रील्लर सूडपटात अमीर खान सोबत सुप्रिया पाठक ..पंकज कपूर अशी तगडी टीम होती . संपूर्ण चित्रपट एका संथ  उदास डार्क रंगात चित्रित केला गेला होता .

वयाने आपल्यापेक्षा मोठ्या असलेल्या मैत्रिणीबरोबर नायक अमीरखान पार्टी वरून परतत असतो त्याच वेळी शहरातील गुंड आणि त्याची माणसे त्याच्या मैत्रिणीवर सुप्रिया पाठकवर बलात्कार करतात ..त्यांना मारहाण करतात . नेहमीप्रमाणे पोलीस नायक आणि 

नायिकेच्या बाजूने उभे राहत नाहीत तेव्हा नायक स्वतः बदला घेण्याचे ठरवितो .

त्याच वेळी एक निलंबित झालेला प्रामाणिक पोलीस अधिकारी त्याच्या मदतीला येतो आणि दोघे मिळून सूड पूर्ण करतात.

खरे तर ही नेहमीची सूडकथा पण पडद्यावर ती उत्तमरीत्या मांडली गेली आहे . २१ वर्षाच्या कोवळ्या तरुणाचे एका गंभीर माणसात होणारे रूपांतर अमीरखानने उत्कृष्टपणे वठविले आहे . त्याला पंकज कपूर ने सुंदर साथ दिली आहे .मधुकर तोरडमल आणि होमी वाडिया यांनी आपल्या  छोट्याश्या भूमिकेत छाप पाडली आहे .

या चित्रपटासाठी 1989 साली पंकज कपूर आणि आमिरखानला नॅशनल अवॉर्ड मिळाले होते 

© श्री. किरण कृष्णा बोरकर

डिसेप्शन पॉईंट... डॅन ब्राऊन

डिसेप्शन पॉईंट... डॅन ब्राऊन 

अनुवाद.... अशोक पाध्ये

मेहता पब्लिकेशन

अमेरिकेच्या अध्यक्षपदाची निवडणूक जवळ आली आहे .अध्यक्षांच्या विरुद्ध उभा असलेला उमेदवार सिनेटर सेक्टन प्रचाराच्या आणि लोकप्रियतेच्या बाबतीत त्यांच्यापेक्षा चार पावले पुढे आहे . पण त्याची मुलगी रॅकेल अध्यक्षांच्या गुप्तखात्यात माहिती संकलनाच्या वरिष्ठ पदावर कार्यरत आहे. 

सिनेटरने आता नासा या अंतराळ संशोधन केंद्रावर लक्ष केंद्रित केले . नासा दरवर्षी करोडो रुपये आपल्या संशोधनावर खर्च करून करदात्यांच्या पैश्याची उधळपट्टी करते असा त्याचा आरोप आहे आणि अमेरिकन जनता यासाठी त्याच्या मागे उभी राहिली.

त्याचवेळी अध्यक्षांनी रॅकेलशी भेट घेऊन तिला नासाच्या नवीन शोधकार्याविषयी माहिती घेण्याचे सुचविले आणि आर्टिक खंडात पाठविले.

नासा आर्टिक खंडावर एक नवीन संशोधन करतेय आणि ते संशोधन यशस्वी झाले तर विजयाचे पारडे पुन्हा अध्यक्षांच्या बाजूने झुकेल .  

रॅकेल हजारो मैलाचा प्रवास करून आर्टिक खंडावर पोचते आणि सुरू होतो एक रहस्यमय थरार .

तिला नासाने लावलेल्या शोधाची माहिती मिळते .एक डेल्टा फोर्सची टीम त्या संपूर्ण टीमवर दुरून लक्ष ठेवून आहे . नासाला मदत करण्यासाठी चार  खाजगी शास्त्रज्ञही हजर आहेत . तो शोध पूर्ण होतो आणि त्याचे चित्रीकरण अध्यक्षांकडे पोचते . पण नंतर काहीतरी घडते आणि डेल्टाफोर्स त्या शास्त्रज्ञाच्या जीवावर उठते . त्यात रॅकेलही ओढली जाते .

असे कोणते रहस्य आहे ज्याने डेल्टा फोर्सचे कमांडो आपल्या अत्याधुनिक हत्यारांसह त्यांच्या मागे लागले आहेत. त्या सर्वांना काहीही करून संपला असे आदेश डेल्टा फोर्सला दिले आहेत.

कोण आहे ह्या सर्वांच्या मागे ....?? रॅकेल या सर्व प्रकरणाच्या मुळाशी जाऊन खऱ्या सुत्रधाराला जगासमोर आणेल का ...?? पण त्यासाठी तिला स्वतःचा जीव वाचवावा लागेल .

या कादंबरीत वापरलेले तंत्रज्ञान आणि संस्था खऱ्याखुऱ्या आहेत .ही कादंबरी आपल्याला हिमनदी ,समुद्र आणि अवकाश याचा प्रवास घडवून आणते .

डॅन ब्राऊनची चोवीस तासात घडणारी एक थरारक ,उत्कंठावर्धक कथा .

ऐवज.... संपादन .. अरुण शेवते

ऐवज.... संपादन .. अरुण शेवते

ऋतूरंग प्रकाशन 

ऋतुरंगच्या १९९३ ते २००९ या दिवाळी अंकातील काही मोजक्याच लेखांचे एकत्रीकरण करून हा ऐवज अरुण शेवते यांनी आपल्यासमोर ठेवला आहे . मान्यवरांचे लेख संपादकानी यासाठी निवडले. 

त्यात त्यांनी अनेक विभाग केले आणि त्यानुसार लेख निवडले आहेत.

 मैत्र जीवाचे या विभागात त्यांनी साहिर अमृता यांची मैत्री ..तर बाबासाहेब आंबेडकर आणि लंडनमधील त्यांची मैत्रीण एफ  यांचा संवाद ..इंदिरा गांधीनी तिची न्यूयॉर्कमधील मैत्रीण डोरोथी हिला लिहिलेली पत्रे असे लेख आहेत.

 अनुभव या विभागात बाबामहाराज सातारकर ,विश्वास पाटील.. जावेद अख्तर  यांचे लेख आहेत.

मनातल्या पावसात सुशीलकुमार शिंदे, बाबासाहेब पुरंदरे ,ना. धो. महानोर यासारख्या मान्यवरांनी आठवणी जागविल्या आहेत .

खूप प्रसिद्ध अश्या व्यक्तींचे लेख अनुभव आपल्याला या मोठ्या पुस्तकात एकत्र वाचायला मिळतात .

यात किशोरी आमोणकर,दीप्ती नवल आहेत.  राजीव सोनिया गांधींची प्रेमकहाणी आणि शोभा गुर्टू यांचा संसार ही वाचायला मिळतो. उस्ताद झाकीर हुसेन ,हेमामालिनी आपल्या आयुष्यातील अविस्मरणीय दिवस सांगतात तर  डॉ. रघुनाथ मालशेकर, अण्णा हजारे ,शबाना आझमी ,पंडित जसराज  माझं जगणं माझी भूमिका यामध्ये दिलखुलासपणे व्यक्त होतात .

६७५ पानांचे मोठ्या बांधणीचे हे पुस्तक म्हणजे नावाप्रमाणेच ऐवज आहे . असे पुस्तक संग्रही असायला हवे . पुस्तकाची किंमत हजार रुपये आहे . पण किमतीच्या मनानं हा ऐवज नक्कीच मोठा आहे .