वधानधी

Vadhandhi – वधानधी

“पोलीस असणे हा एक शापच आहे,” असे सिनियर इन्स्पेक्टर मुसा रझा केसचा तपास पूर्ण झाल्यानंतर म्हणतो. हीच भावना या मालिकेच्या संपूर्ण कथेला एक वेगळी खोली देते.

मुसा रझा हा एक प्रामाणिक पोलीस अधिकारी आहे. नेहमी सत्याच्या बाजूने उभे राहणे आणि त्यासाठी आपल्या नोकरीचीही पर्वा न करणे, हा त्याचा स्वभाव. तो अतिशय शांतपणे वागतो आणि समोरच्या व्यक्तीशी नेहमी आदराने बोलतो. कदाचित त्याच्या याच स्वभावाचा परिणाम म्हणून त्याची पोस्टिंग एका छोट्या गावात केली जाते, जिथे फारशा सुविधाही उपलब्ध नाहीत.

या गावातून नॅशनल हायवे जाणार असतो; मात्र अनेक गावकऱ्यांचा त्याला विरोध असतो. हायवेसाठी होणाऱ्या भूमिपूजनाच्या वेळी खोदकाम सुरू असताना तिथे एक मानवी सांगाडा सापडतो. हा सांगाडा नेमका कोणाचा आहे, याबाबत कोणतीही माहिती उपलब्ध नसते.

एसपी राधिका नायर मुसा रझाला या प्रकरणाचा तपास करण्याची जबाबदारी सोपवतात. मुसा रझा अवघ्या दोन दिवसांत त्या सांगाड्याची ओळख पटवतो आणि हे प्रकरण तामिळनाडूमधील मणी नावाच्या व्यक्तीपर्यंत पोहोचते. या प्रकरणात मणीला आधीच दोषी ठरवून शिक्षा झालेली असते.

मुसा रझा मणीला भेटतो. मात्र मणी या गुन्ह्यात निरपराध असल्याचा संशय त्याला येतो. त्याचे वरिष्ठ अधिकारी डीएनए रिपोर्ट येण्याची वाट न पाहताच मणीला दोषी ठरवून मोकळे होतात आणि मणीला शिक्षा होते.

मात्र नंतर आलेल्या डीएनए रिपोर्टमध्ये प्रेतावर तिसऱ्या व्यक्तीचा डीएनए सापडतो आणि संपूर्ण प्रकरणाला अनपेक्षित वळण मिळते. या अहवालामुळे सर्वांनाच धक्का बसतो. मुसा रझा आपल्या प्रयत्नांनी केस पुन्हा उघडतो आणि नव्याने तपासाला सुरुवात करतो.

मणीची प्रेयसी आणि त्याची बहीण या दोघींचाही खून झालेला असतो आणि हे खून मणीनेच केले आहेत, असे सर्वांना वाटत असते. मात्र मणी स्वतः याबाबत काहीही बोलण्यास तयार नसतो.

या तपासादरम्यान एसपी राधिका नायर आणि मुसा रझा या दोघांवरही वरिष्ठांकडून प्रचंड दबाव असतो. संशयाच्या भोवऱ्यात येणाऱ्या व्यक्तींच्या डीएनए चाचण्या केल्या जातात; मात्र प्रत्येक वेळी अहवाल निगेटिव्ह येतो आणि संशयित सुटत जातात.

अनेक अनपेक्षित वळणे घेत हा तपास मुसा रझाची अक्षरशः परीक्षाच घेत राहतो. प्रत्येक नव्या धाग्याबरोबर गूढ अधिकच वाढत जाते. शेवटी या प्रकरणाचे सत्य बाहेर येते आणि ते सर्वांसाठीच धक्कादायक ठरते.

पहिल्या सीझनचा दुसऱ्या सीझनशी कोणताही संबंध नाही. दोन्ही सीझनमध्ये स्वतंत्र तपासकथा आहेत. दुसरा सीझन अतिशय संथपणे पुढे सरकतो; मात्र त्याच वेळी तो प्रेक्षकांची उत्कंठा सातत्याने वाढवत राहतो. कथा घाईघाईने पुढे नेण्याऐवजी प्रत्येक पात्र, प्रसंग आणि तपासातील बारकावे हळूहळू उलगडले जातात.

एस. ससीकुमार यांनी इन्स्पेक्टर मुसा रझाची भूमिका अतिशय प्रभावीपणे साकारली आहे. त्यांचा मुसा रझा हा नेहमीच्या आक्रमक पोलिस अधिकाऱ्यापेक्षा वेगळा वाटतो. तो समोरच्याला धमकावण्यापेक्षा समजून घेण्याचा प्रयत्न करतो. त्यामुळे अनेक प्रसंगी तो पोलीस अधिकारी कमी आणि समुपदेशक अधिक वाटतो. हेच या मालिकेच्या प्रमुख आकर्षणांपैकी एक आहे.

 वधानधी’ ही संथ गतीने पुढे जाणारी, पण रहस्य आणि उत्कंठा कायम ठेवणारी तपासकथा आहे. सत्य शोधण्याच्या प्रवासात एका प्रामाणिक पोलीस अधिकाऱ्याला कोणत्या मानसिक आणि व्यावसायिक संघर्षांना सामोरे जावे लागते, हे मालिका प्रभावीपणे दाखवते.

‘ही सिरीज  प्राईम व्हिडिओवर हिंदी भाषेत उपलब्ध आहे.