द सिक्रेट ऑफ शिलेदार

द सिक्रेट ऑफ शिलेदार 

The Secret Of The Shiledars

ज्यांनी डॉ. प्रकाश सूर्यकांत कोयाडे यांचे प्रतिपश्चंद्र पुस्तक वाचले असेल त्यांना ही सिरीज पटकन संपल्यासारखी वाटेल.खजिन्याचा शोध घेणे ही सोपी गोष्ट नाही त्यात जर छत्रपती शिवाजी महाराजांचा खजिना असेल तर फारच कठीण काम.

असाच एक खजिना शिलेदार बहिर्जी नाईक यांनी लपवून ठेवला आहे आणि त्याच्या रक्षणासाठी काही शिलेदारांची नेमणूक केली होती.हे शिलेदार पिढ्यानपेढ्या त्या खजिन्याचे रक्षण करतायत. ह्या खजिन्यापर्यंत पोचण्यासाठी अनेक कोड ,चिन्हे आणि अनेक गुप्त मार्ग आखले गेले आहेत.

डॉ. रवी हा आताच्या काळातील खजिन्याचा शिलेदार आहे . पण त्याला याविषयी काहीच माहिती नाही . त्याच्यामागे ह्या खजिन्याच्या शोधात असणारे अनेकजण लागले आहेत.

काय आहे या खजिन्याचे रहस्य . डॉ. रवी ते गुपित शाबूत ठेवेल का ?

पुस्तक वाचताना जो रोमांचकारी अनुभव येतो तो अनुभव ही सिरीज पाहताना येत नाही .उलट ही सिरीज पटकन संपल्यासारखी वाटते. दिग्दर्शकाला लेखकाशी चर्चा करून अजून पटकथेची जोड देऊन सिरीज वाढवता आली असती किंवा त्याने हा एक चित्रपट बनवला असता तरी चालले असते. 

राजीव खंडेलवाल मुख्य नायकाच्या भूमिकेत आहे .तर सई ताम्हणकर नुसती शोभेची बाहुली आहे. एक नायिका नायिकेसोबत असावी म्हणून ती आहे .तिच्याजागी एखादा पुरुष असता तरी चालले असते. तिला फक्त सतत फ्रेममध्ये राहायचे काम आहे.तिला फारसे संवाद नाहीत एक दोन एक्शन सीन आहेत. एका चांगल्या अभिनेत्रीला वाया घालवल्याचे दुःख वाटते.

बाकी दिलीप प्रभावळकर , नंदू माधव छोट्या भूमिकेत चमकले आहेत.आशिष विद्यार्थी ला मोठी भूमिका आहे.

खजिन्यावर आधारित बरीच पुस्तके आहेत .शोध ,विश्वस्त , कालचक्राचे रहस्य , अश्विन संघीची पुस्तके .यावर चांगल्या थरारक वेब सिरीज होऊ शकतात.

आदित्य सरपोतदार यांनी एक मराठी कलाकृती राष्ट्रीय पातळीवर नेली त्याबद्दल त्यांचे हार्दिक अभिनंदन

ही सिरीज हॉटस्टारवर मराठी हिंदी आणि इतर भाषेत आहे.