असे पाहुणे येति
"भाऊ....." अशी ती परिचित हाक कानावर आली आणि भीतीने पोटात गोळा उठला.पण यावेळी स्वयंपाकघरातून भांडी पडल्याचे आवाज ऐकू आले नाहीत याचे आश्चर्य वाटले.म्हणजे संतोष दिघेचे येणे हिला मान्य असावे.
आता हा संतोष दिघे कोण ....?? स्वतःला साहित्यिक समजणारा आणि मालिका लिहिणारा माझा वर्गमित्र.वर्गात होता म्हणून वर्गमित्र म्हणायचे असा विक्रम म्हणतो. घरच्यांवर उपकार करायचे म्हणून हा शाळेत यायचा हे माझे मत. त्याला लिखाणाची आवड लहानपणापासूनच होती बरे का ....मुलींना प्रेमपत्र लिहिण्यात याचा हातखंडा. पण याने लिहिलेल्या प्रेमपत्रामुळे अनेकांचे संसार सुरू होण्याआधीच वाचले. असे विक्रमाची बायको वनिता म्हणते. दुर्दैवाने याने विक्रमला प्रेमपत्र का लिहून दिले नाही असे ही दोघांच्या भांडणात बऱ्याचवेळा म्हणते .
असो ... तर वेळीअवेळी घरी टपकणे ही त्याची जुनी सवय. सौ.लाही ते माहीत आहे कारण लग्नाच्या पहिल्या रात्री यानेच आमच्या बेडरूमचा दरवाजा वाजवून मला उठवले होते आणि भाऊ सावकाश असा सल्ला देऊन निघून गेला होता. तेव्हापासून सौ.हा घरात शिरला की भांडी आपटून निषेध व्यक्त करत असते.
दिघ्या घरात शिरताच त्याचे थंड पाण्याने स्वागत झालेले पाहून मी चक्रावलो. माझ्याविरुद्ध काही कट शिजणार याचा संशय येऊ लागला .
"दिघ्या.....अचानक इकडे कुठे ...?? सिरीयल बंद केल्यास का ...?? मी नजर रोखूनच विचारले.असे मी नेहमी त्याला विचारतो.कारण कोणत्याही सिरियलमध्ये संतोष दिघे हे नाव कधीच वाचले नाही.
"वहिनीने बोलावले आहे ... "माझ्याकडे छद्मीपणे पाहत त्याने उत्तर दिले.
"हो....मीच बोलावले होते पण असे अचानक येतील याची कल्पना नव्हती. सौने त्याच्या पुढ्यात कांदाभजीची प्लेट ठेवली. ते पाहतच माझा राग थोडा निवळला . कांदाभजी आज खारट झाली होती म्हणून मी चिडलो होतो आणि ती फेकून द्यायचा हुकूम सौ ला केला होता. पण अन्न वाया जाऊ नये या सौच्या धोरणामुळे तिने ती डिश संतोषच्या पुढ्यात ठेवली .
"भाऊजी .... "मोठ्या कष्टाने आपला आवाज मवाळ करीत सौ.म्हणाली .. माझी भाची आहे गावाला . तिच्या कामाचे बघा ना ...तिला एखाद्या सिरियलमध्ये काम द्या.."
"देवा .... शेवटी हेच काम तर...." बिचारी इतकी वर्षे माझ्यासोबत राहून ह्या दिघ्याला ती ओळखू शकली नाही याचे दुःख झाले मला .
"हात्तीच्या....!! बस इतकेच ....तिचे काम झालेच म्हणून समजा. एका नवीन सिरियालमध्ये तिला नायिकेचा रोल देतो... "भजी तोंडात टाकून दिघ्या सहज स्वरात म्हणाला .
"पण भाऊजी ती थोडी तोतरी बोलते...."सौ चाचरत म्हणाली .
"त्यात काय...?? आपण तिच्या तोतरेपणावर कथा लिहू..." दिघ्या भजीला जागून म्हणाला .
"दिसायलाही इतकी खास नाही.... थोडी काळी आणि जाड.... "सौ.खाली आवाजात म्हणाली.
"असुदे.. नेहमीच नायिका गोऱ्या सडपातळ सुंदर हव्या असा नियम नाही.... आणि तसेही परडे परवडत नाही .त्यापेक्षा अश्या मुलींना नायिका करून चारशे भागाची एक मालिका बनेल . करून टाकू एक सिरीयल ..."पाण्याचा एक घोट घेत दिघ्या चेहऱ्यावरची रेषाही न हलविता म्हणाला .
मानलं दिघ्या तुला ..... मी मनात म्हटले. इतकी खारट भजी खाऊन चेहरा कोरा ठेवणे फक्त संतोष दिघेलाच जमू शकते हे आज पुन्हा पटले.
"वहिनी तुला काम करायचे आहे का ..??? संतोषने सौला डायरेक्ट विचारले.तसे सौचे डोळे मोठे झाले .
"अय्या काहीतरीच काय ..... थांबा मी सरबत घेऊन येते.."असे म्हणून ती धावत आत गेली.
हे अति झाले ... ते सरबत मी कॉकटेलसाठी ठेवले होते .आता विक्रम शिव्या घालणार मला ...मी मनात चरफडलो.
"भाऊ ... तू ही काम कर पाच दहा एपिसोडमध्ये....".संतोष दात कोरत म्हणाला.
"काहीतरीच काय....?? मला कुठे अभिनय करता येतो.." मी उत्तरलो.
"अरे... तुझा चेहराच केविलवाणा आहे . एका रंजलेल्या गांजलेल्या माणसाची भूमिका तुला फिट आहे. तोच चेहरा घेऊन वावरायचे . हल्लीच्या सिरीयल बघत नाहीस का ....?? मेकअप तरी करतात का सिरियालमधील पात्रे...?? संतोष हसत म्हणाला आणि सौ च्या हातातील ग्लास ओढून घेतला .
"ठरले तर ..... वहिनी तुमच्या भाचीवर मी सिरीयल लिहायला सुरुवात करतो. पाहिले पन्नास भाग तर तिच्या तोतरेपणाच्या विनोदावर जातील. ती दिसायला सुंदर नाही म्हणून तिची हेटाळणी होईल .पुढील पन्नास भागात तिचे प्रेम.. लग्नाच्या गोष्टी.नंतर पन्नास भाग तिला सासरचा त्रास....मग पुढे तिचा लढा यावर पन्नास भाग असे करून सिरीयल टीआरपी प्रमाणे वाढवत नेऊ .आता मी निघतो यापुढे येणे होईलच ...."सरबत संपवून दिघ्या उठला.
"हो नक्की या ... आणि यापुढे कधीही आलात तरी जेऊनच जायचं ...."सौ. आग्रहाने म्हणाली
पुन्हा एकदा माझ्याकडे पाहत छद्मीपणे हसत संतोष दिघे घरातून बाहेर पडला ते कधीही येऊन जेवायची परमिशन घेऊनच .
© श्री. किरण कृष्णा बोरकर
