द मिसिंग

द मिसिंग ....ख्रिस मुनी

अनुवाद ...नारायण पै

मेहता पब्लिशिंग हाऊस

 साधारण चोवीस वर्षांपूर्वी मेलनी, स्टेफी आणि डार्बी  निर्जन जागी बियर पीत होत्या . त्याचवेळी एका स्त्रीची गळा दाबून हत्या होताना त्यांनी पाहिली. त्यांनी  911 ला फोन केला पण पोलिसांना काही सापडले नाही. उलट खुन्याच्या हातून स्टेफी  मारली गेली आणि मेलनी बेपत्ता झाली .हल्लेखोर काही दिवसांनी मारला गेला असे जाहीर करण्यात आले.

 आता डार्बी मॅकोर्मीक पोलीस अधिकारी झालीय. एका गुन्हा घडलेल्या जागी तिला एक तरुण मुलगी सापडते.ती अतिशय घाबरलेली आणि बरेच दिवस कैदेत असलेली वाटते. तिच्याविषयी तपास करताना अजून एक मुलगी त्या मुलीसोबत होती असे डार्बीला कळते. पण या तपासात पुढे काय काय सापडेल याची कल्पना डार्बीला नसते आणि जेव्हा कळते तेव्हा ती हादरून जाते.

गेल्या वीस वर्षांत अनेक महिला आणि तरुणींचे अपहरण झालेय. यात जे अपराधी आहेत त्यांचा संबंध डार्बी आणि तिच्या बेपत्ता मैत्रिणींशी आहे . तो खुनी अजूनही डार्बीला शोधतोय .तर  आजही डार्बी मेलनीचा शोध  घेतेय. 

कोण आहे या खुनाच्या आणि अपहरणाच्या मालिकेचा सूत्रधार ? डार्बी या प्रकरणाच्या मुळाशी जाईल का ? यात अनेक धक्कादायक अनपेक्षित वळणे आहेत .खुनी अतिशय हुशार आहे आणि तो पोलिसांच्या एक पाऊल पुढेच आहे .पण शेवटी एक चूक त्याला महागात पडणार आहे.

बेअर आयलंड

बेअर आयलंड ..ऍलिस्टर मॅक्लिन

अनुवाद ..अशोक पाध्ये 

मेहता पब्लिशिंग हाऊस

मॉर्निंग रोज खरे तर एक जुनाट मासेमारीसाठी वापरण्यात येणारे मोठे जहाज .पण आज ते एका चित्रपट संस्थेच्या युनिटला आर्टिक महासागरातील एका बर्फाच्छादित बेटाकडे निघाले होते. त्या बेटाचे नाव बेअर आयलंड होते. बेटावर मानवी वस्ती नव्हतीच.ते ओसाड होते.दुसऱ्या महायुद्धात जर्मनांनी त्या बेटाचा वापर केला होता अशी अफवा होती.आज ते बेट नार्वेच्या ताब्यात होते.

कॅप्टन इम्री बोटीचा कॅप्टन होता. जहाजावर डॉक्टर मार्लो सर्वांच्या तब्बेतीची काळजी घेण्यासाठी होता. प्रवासात त्या युनिटमधील एक जण अन्न विषबाधेने मृत्यू पावला .पण तो अपघात नसून खून आहे हे डॉक्टरच्या लक्षात आलेय. नंतर अजून दोन व्यक्ती विषबाधेने मरण पावतात.या जहाजावर एक खुनी आहे हे डॉक्टरच्या लक्षात येते.

पुढे बेअर आयलंडला पोचल्यावर अजून काहीजण मृत्यू पावतात.या सगळ्यांचे खून कोणीतरी जाणीवपूर्वक करतेय हे डॉक्टरच्या लक्षात येतेय..या ओसाड बेटावर चित्रपटाच्या शूटिंगचे काय कारण असावे ? अजून कितीजणांचा खून होणार होणार आहे ?

शेवटपर्यंत ताणून धरलेला रहस्यमय थरार आपल्याला खिळवून ठेवतो.

अपेक्स

Apex

अपेक्स

साशा आणि टॉमी  नवरा बायको  उत्कृष्ट गिर्यारोहक आणि ट्रेकर . नॉर्वेत उंच कड्यावर ट्रेकिंग करताना टॉमीचा अपघाती मृत्यू होतो आणि साशा एकटी पडते.

या घटनेला 5 वर्षे उलटून गेलीय.आता साशा एकटीच ट्रेकिंगला जाते.सध्या ती ऑस्ट्रेलियात आलीय.ऑस्ट्रेलियात त्या भागात भयानक जंगल , जोरात वाहणाऱ्या नद्या आणि उंच कडे आहेत . रस्त्यात फॉरेस्ट ऑफिसर म्हणवून घेणारा बेन तिला योग्य रस्ता दाखवायला मदत करतो.

साशा तिथे ट्रेकिंग करते .जोरात वाहणाऱ्या नदीतून नौका चालवते. रात्री तंबूत झोपते.पण सकाळी उठल्यावर आपले सामान चोरीला गेलंय हे लक्षात येते. ते शोधत असताना तिला बेन दिसतो.बेन तिला जेवण देतो .पण आपले सामान बेनने चोरले आहे हे तिच्या लक्षात येते तोपर्यंत उशीर झालेला असतो.बेन तिला बांधून ठेवतो .थोड्या वेळाने तिला जंगलातून पळायची संधी देतो आणि शस्त्र घेऊन तिच्या मागावर निघतो. 

आता सुरू झालाय शिकारीचा खेळ.बेन शिकारी आहे तर साशा शिकार .आपला ट्रेकिंगचा सगळा अनुभव पणाला लावून साशाला त्या  अनोळखी घनदाट  जंगलातून स्वतः चा जीव वाचवत बाहेर पडायचे आहे तर बेनला हे जंगल पूर्णपणे माहीत आहे.तो साशाच्या दोन पावले पुढेच आहे.

साशा बेनला चकमा देऊन जंगलातून बाहेर पडेल का ? असे काय रहस्य बेनकडे आहे त्यामुळे तो साशाच्या जीवाशी खेळ खेळतोय.

चित्रपटाचे चित्रीकरण सुंदर आहे.जंगल आपल्या अंगावर येते. 

चित्रपटात साशा आणि बेन या दोनच प्रमुख व्यक्तिरेखा आहेत .

संपूर्ण चित्रपट आपल्याला श्वास रोखून पहायला लावतो.चित्रपट नेटफ्लिक्स वर हिंदी भाषेत आहे.

द स्टोनहेंज लेगसी

द स्टोनहेंज लेगसी ...सॅम ख्रिस्टर

अनुवाद ..अशोक पाथरकर

मेहता पब्लिशिंग हाऊस

प्रा. नाथानिएल चेस जगप्रसिद्ध पुराणवास्तू संशोधक .एके सकाळी त्यांनी आपल्या बंगल्यात डोक्यात गोळी मारून आत्महत्या केली. मृत्यूपूर्वी त्याने आपला मुलगा गिडीयनसाठी चिट्ठी लिहून ठेवली.

स्टोनहेंज इंग्लंडमधील महत्वाचे प्राचीन स्मारक आणि पर्यटन स्थळ आहे . नाथानिएल चेस हजारो वर्षे जुना असलेल्या एका पंथाचे सभासद होते.असे म्हणतात स्टोनहेंज येथील जुन्या दगडांवरून वाहिलेले पाणी अंगावर घेतल्यास अनेक व्याधी बऱ्या होतात. तो पंथ त्या जागेचे गुप्तपणे रक्षण करतो पण त्यासाठी ते नरबळी ही देतायत .

यावेळी त्यांनी नरबळीसाठी व्यक्ती निवडली आहे ती चुकून अमेरिकेच्या उपराष्ट्राध्यक्षाची मुलगी केटलीन आहे.तिच्यासोबत असणारा तिचा बॉयफ्रेंड जॅक टिबरलँड झटापटीत मारला गेलाय.

इथे गिडीयनवर पाळत ठेवली जातेय.त्याच्या घराची झडती घेतली गेलीय .आग लावली गेली.या घटनेची चौकशी करण्यासाठी मेगन बेकर या स्त्री अधिकारीची नेमणूक झालीय.

घरात लागलेल्या आगीच्या प्रकरणाचे धागेदोरे केटलीनच्या अपहारणाकडे नेतात .

या पंथात फार मोठी लोक गुंतलेली आहेत.बेकर कोणावरच विश्वास ठेवू शकत नाही .उलट तिलाच आता दुसऱ्या डिपार्टमेंटला प्रमोशनवर पाठविले जाणार आहे.

तरीही बेकर केटलीनची सुटका करेल का ? 

पाच हजार वर्षांपासून चालत आलेल्या प्रथेला बेकरमुळे धक्का बसेल का ?

टोस्टर

Toaster

टोस्टर

रमाकांतचे परफ्यूमचे दुकान आहे. घरी बायको आहे.तसा रमाकांत खूप चांगला आहे पण अतिशय कंजूस आहे. इतका कंजूस की सकाळचा ब्रेकफास्ट तो आपल्या घरमालकिणीकडे  डिसोझा बाई कडे करतो. दुपारचे जेवण कोणत्याही अन्नछत्रात करतो. डिसोझाबाईचा मुलगा ग्लेन व्यसनी आहे.त्याच्याकडे आमदार आमरेचे काही व्हिडिओ आहेत.

एका जवळच्या नातेवाईकाच्या लग्नात रमाकांत गिफ्ट म्हणून 5000 रु चा टोस्टर घेतो. पण दुसऱ्या दिवशी ते लग्न मोडते आणि ते सर्व गिफ्ट अनाथाश्रमात देऊन टाकतात. आपले गिफ्ट फुकट गेले म्हणून रमाकांत चिडतो आणि त्या अनाथाश्रमातून तो टोस्टर चोरून डिसोझाबाईकडे ठेवतो.ग्लेन त्या टोस्टरमध्ये आमदाराच्या व्हिडिओचे मेमरी कार्ड लपवतो. 

दुर्दैवाने डिसोझा बाई मरण पावते .तिच्या घरातून टोस्टर चोरताना रमाकांत आणि ग्लेनची झटपट होते आणि ग्लेनचा मृत्यू होतो.

त्या घटनेचा व्हिडिओ फेरवानी मॅडम काढून रमाकांतला ब्लॅकमेल करू लागते. इंस्पेक्टर बालगोंडे आमदाराचा माणूस आहे .त्याला ते व्हिडिओ हवे आहेत आणि मेमरी कार्ड त्या टोस्टरमध्ये आहेत याची खात्री आहे.

रमाकांत चारीबाजूने अडकला आहे.तो यातून जितके बाहेर पडण्याचा प्रयत्न करतो तितकाच अडकत जातो.

राजकुमार राव रमाकांतच्या मुख्य भूमिकेत आहे तर साथीला सन्या मल्होत्रा ,अर्चना पुरन सिंह , उपेंद्र लिमये आहेत.छोट्या भूमिकेत जितेंद्र जोशीने  रंग भरले आहेत.

कॉमेडी थ्रिलर प्रकारातील हा चित्रपट नेटफ्लिक्सवर हिंदी भाषेत आहे.

गरुडन

Garudan

गरुडन 

कॉलेज गॅदरिंगची प्रॅक्टिस संपवून तेरेसा घरी जायला निघते आणि तिच्यावर अत्याचार होऊन प्रचंड मारहाणही होते.जखमी अवस्थेत ती सलाम कॅपरीला सापडते आणि तो त्या नराधमालाही पाहतो. 

तेरेसा कोमात जाते .डीसीपी हरीश माधवकडे हे प्रकरण सोपविले जाते.हरीश माधव हुशार आणि प्रामाणिक आहे.  तो आरोपीला पकडतो .आरोपी आहे तिच्याच कॉलेजमधील एक प्रोफेसर निशांत कुमार.

निशांत कुमार चे डीएनए मॅच होतात आणि सलाम कॅपरीही त्याला ओळखतो. सर्व पुरावे निशांत कुमारच्या विरुद्ध असतात .आरोप सिद्ध होऊन त्याला सात वर्षाची शिक्षा होते.

सात वर्षानंतर निशांतकुमार तुरुंगातून बाहेर पडतो .त्याने तुरुंगातून कायद्याची पदवी घेतलेली असते.तो आता वकील बनला आहे. पण आता त्याला समाजात गुन्हेगार म्हणूनच पाहिले जाते.त्याची पत्नी आणि मुलगी दुरावले जातात.

 डीसीपी हरीश निवृत्त होतोय.त्याला आपल्या सर्व्हिस फंडातून जे पैसे मिळणार त्यातून मुलाचे परदेशात शिक्षण करायचे आहे. तो निवृत्त होताच निशांत आपली केस पुन्हा ओपन करतो आणि स्वतःचे निरापराधित्व सिद्ध करतो आणि समाजात पुन्हा मानाचे स्थान मिळवतो इतकेच नव्हे तर तो हरिशकडून ऐंशी लाखाची नुकसानभरपाई  घेण्याची  कोर्टाकडून ऑर्डर काढतो. या सर्व प्रकारामुळे हरीश खचून जातो आणि अधिक चुका करतो.

निशांतच अपराधी आहे हे हरीशला माहीत आहे पण आता समाजाची सहानुभूती निशांतला आहे.एक मोठा वकील म्हणून त्याचे नाव झालेय.समाज आता हरीशला अपराधी समजतोय.

निशांतने कोणत्या योजना आखून स्वतःला निरपराधी सिद्ध केलंय आणि त्याला कोणी साथ दिलीय हे हरीशला शोधून काढायचे आहे पण आता तो एकटा पडलाय.तरीही तो स्वतःला सिद्ध करेल का ?

खरोखर निशांत अपराधी आहे की हरीशचा तपास चुकीचा होता ??

शेवटपर्यंत श्वास रोखून ठेवणारा हा चित्रपट हॉटस्टारवर हिंदी भाषेत आहे.-

Sambhavam adyayam onnu

Sambhavam adyayam onnu

(Incident chapter one )

केरळ आणि तामिळनाडूच्या बॉर्डरवर घनदाट जंगल आहे.ते जंगल फारच गूढ आणि अतर्क्य गोष्टीने भरलेले आहे असे म्हणतात ..जंगलात एक कावळ्याची मोठी दगडी मूर्ती आहे पण कावळेमात्र दिसत नाहीत. पोलीस अधिकारी आनंदची बदली केरळ बॉर्डर वर झालीय.नुकतीच त्याला मुलगी झालीय.जंगलातून पोलीस स्टेशनला जाताना एक जखमी पोलीस अधिकारी  त्यांच्या गाडीला धडकतो .तो त्याला हॉस्पिटलमध्ये दाखल करतो इतक्यात त्याच्या युनिटला अजून एक बॉडी सापडते.आणि त्यांना सापडलेल्या वॉकी टॉकीमधून अजून एका जखमी ऑफिसरचा आवाज ऐकू येतो.

आनंद आणि त्याचे दोन साथीदार त्याचा शोध घ्यायला जंगलात शिरतात.त्या जखमी पोलीस अधिकाऱ्यांशी संवाद साधत असताना  तामिळनाडू पोलीस स्टेशनला अधिकारी आपल्याकडे या नावाचे कोणीच पोलीस अधिकारी नाहीत असे सांगतो पण वॉकी टॉकी वरून त्याचा आवाज आणि पूर्ण नाव ऐकताच तो हादरतो. तो त्या तिघांनाही तपास सोडून त्या जंगलातून पळून जायची सूचना करतो.

आता सुरू होतो एक भयानक पाठलाग.आनंद आणि त्याच्या साथीदारांना जंगलातून बाहेर पडणे मुश्किल झालंय. ते कोणत्याही दिशेने गेले तरी पुन्हा त्याच जागी येतात.आनंदचे दोन्ही साथीदारही मारले जातात.

शेवटी आनंद त्या जंगलातून बाहेर पडतो पण बाहेरचे दृश्य पाहून हादरून जातो.

काय आहे नक्की प्रकार ? हा कसला चक्रव्यूह आहे ज्यात आनंद पुन्हा पुन्हा गुरफटून जातोय.

अंगावर काटा आणणारे आणि आपल्याला त्यात गुरफटवून टाकणाऱ्या ह्या जंगलात नक्की काय घडतंय .

हॉटस्टारवर हा चित्रपट हिंदी भाषेत आहे .नक्की पहा.