706 ...( 2019)
आज बारा दिवस झाले डॉक्टर अनिल अस्थाना गायब आहेत. संपूर्ण मुंबई पोलीस त्यांचा शोध घेतेय. डॉक्टर शहरातील नामांकित व्यक्तींपैकी एक . त्यांचे स्वतःचे मोठे हॉस्पिटल आहे . त्यांची पत्नी सुमन ही प्रसिद्ध मानसोपचार तज्ञ आहे . हे प्रकरण फार गंभीर आहे म्हणून स्वतः डीसीपी शेखावत या केसमध्ये लक्ष घालतायत .
याच वेळी डॉक्टरांच्या हॉस्पिटलमध्ये एक दहा वर्षाचा मुलगा नीरज ऍडमिट होतो . त्याला मधेमध्ये झटके येतात . खरे तर त्याचे संपूर्ण रिपोर्ट्स नॉर्मल आहेत . तरीही असे का होते....??. डॉक्टर त्याला डिस्चार्ज देतात पण तो डॉ.सुमनला भेटल्याशिवाय जाणार नाही म्हणतो .
नाईलाजाने डॉ.सुमन त्याची भेट घेण्यास तयार होते . केबिनमध्ये आल्याआल्या तो डॉ. सुमनला विचारतो तुमची बसण्याची जागा बदलली आहे . इतकेच नव्हे तो तिचे पती डॉ.अनिल जिवंत नाहीत हेही सांगतो आणि पोलिसांना ते कुठे सापडतील याची माहिती ही देतो .
ती माहिती खरी ठरते आणि शेखावत हादरतो. दहा वर्षाच्या मुलाला ही माहिती कशी....?? याचा छडा लावायचा प्रयत्न करतो.प्रसंगी तो निराजला धमकीही देतो . ते ऐकून नीरज शेखावतला असे एक रहस्य सांगतो की जे फक्त शेखावतलाच माहीत असते.
थंड डोक्याने शेखावत यामागील रहस्याचा शोध घेण्याचा प्रयत्न करतो आणि काही धक्कादायक गोष्टी समोर येतात . या सगळ्या घटनांचा संबंध मेघदूत हॉटेलमधील रूम नंबर 706 शी आहे . काय घडलंय त्या 706 मध्ये....??? काय आहे शेखावतचे रहस्य ...??
एक उत्कंठावर्धक चित्रपट
यात शेखावतच्या भूमिकेत अतुल कुलकर्णी तर डॉ. सुमानच्या भूमिकेत दिव्या दत्ता आहे .
चित्रपट श्रवणकुमारने दिग्दर्शित केलाय .
