HIT : The Third Case
हिट : द थर्ड केस
आधीच्या दोन केसच्या विरुद्ध अशी ही थर्ड केस आहे. कदाचित यात नानी आहे म्हणून चित्रपटाचा चेहरामोहरा बदलून टाकला असावा.
थर्ड केस ही टिपिकल साऊथ इंडियन फिल्म आहे. यात तपास कार्य कमी आणि रक्तपात जास्त आहे. आधीच्या दोन्ही केस रहस्यमय आणि थ्रिलर होत्या तर ही एक्शन फिल्म आहे.
देशभारत काहीजणांना अतिशय क्रूरपणे उलटे लटकावून खून केले जातायत आणि विशेष म्हणजे याचे चित्रीकरण करून ते डार्क वेबवर पोस्ट केले जातात.त्याचबरोबर खून झालेल्या व्यक्तींचे काही मानवी अवयव गायब आहेत.खरे तर ते अवयव दुसऱ्या व्यक्तींना काहीच उपयोगाचे नाही .
पोलीस ऑफिसर अर्जुन सरकारची बदली वायझॅगला होते पण ड्युटीवर जॉईन होण्यापूर्वी तो ही अश्याच प्रकारे एका व्यक्तीची हत्या करतो.
ऑफिसर अर्जुन भडक माथ्याचा म्हणून ओळखला जातो.
काय आहे अश्या खुनाचे रहस्य ज्यात अर्जुनही फसलाय.
हल्ली किल चित्रपटापासून अति हिंसाचार आणि क्रूरपणा दाखविण्यास सुरवात झालीय. रक्ताने माखलेला नायक प्रेक्षकांना आवडतो.तो कितीही जखमी झाला तरी गुंडांना अंगावर शहारे येतील अशा पद्धतीने संपवितो.कोणाला उभा फाडतो तर कोणाचे मुंडके छाटतो.
ज्यांना अति हिंसाचार आणि अंगावर येणारा रक्तपात पाहायला आवडते त्यांनी हिट : थर्ड केस नक्की बघावा. ज्यांना रक्तपात आवडत नाही त्यांनी मुळीच पाहू नये.
चित्रपट नेटफ्लिक्सवर हिंदी भाषेत आहे .चौथ्या केसमध्ये पोलीस ऑफिसर कोण असेल याचीही झलक आपल्याला मिळते.
