टीच यु अ लेसन

टीच यू अ लेसन (Teach You a Lesson)

कोरियामध्ये विद्यार्थ्यांना खूपच सवलती आणि अधिकार दिले गेले आहेत. अनेक कायदे त्यांच्या बाजूने आहेत. शिक्षक विद्यार्थ्यांवर हात उचलू शकत नाहीत किंवा त्यांच्यावर मोठ्याने ओरडूही शकत नाहीत. पालक समितीचीही शिक्षकांना सतत भीती वाटत असते, कारण पालक शिक्षकांविरुद्ध शिक्षण मंत्रालयाकडे तक्रार करू शकतात, तसेच त्यांच्यावर खटलेही दाखल करू शकतात.

या परिस्थितीचा गैरफायदा घेत अनेक शाळांमध्ये गंभीर समस्या निर्माण झाल्या आहेत. ड्रग्जचा वापर आणि पुरवठा गुप्त मार्गाने वाढत आहे. मोठ्या शाळांमध्ये रॅगिंगचे प्रकार घडत आहेत. या सर्व प्रकारांना आळा घालण्यासाठी शिक्षणमंत्री चॉई गॅंग-सिओ "एज्युकेशन राइट्स प्रोटेक्शन ब्युरो" (ERPB) या विशेष विभागाची स्थापना करतात.

या विभागाचा प्रमुख म्हणून स्पेशल फोर्सचा माजी अधिकारी ना व्हा-जीन याची निरीक्षकपदी नियुक्ती केली जाते. त्याला सहाय्यक म्हणून स्पेशल फोर्समधून आलेली हान रिम ही तरुणी असते.

शाळांमधील गैरव्यवहारांची चौकशी करण्यासाठी ERPB ची स्थापना करण्यात आलेली असते. या विभागाला अमर्याद अधिकार देण्यात आलेले असतात. दहा भागांच्या या मालिकेत प्रत्येक भागात वेगवेगळी प्रकरणे समोर येतात; मात्र सर्व भागांना जोडणारा एक समान धागा संपूर्ण कथेत कायम राहतो.

एका भागात रॅगिंग करणारा एक विद्यार्थी आत्महत्या करतो. त्यामागील कारणांचा शोध घेतला जातो. तर दुसऱ्या भागात, आपल्या मुलाबाबत अतिशय काळजी करणाऱ्या एका आईच्या सततच्या दबावामुळे त्या मुलाची वर्गशिक्षिका आत्महत्येचा प्रयत्न करते.

एका विद्यार्थ्याला वैद्यकीय शिक्षणात प्रवेश मिळावा म्हणून त्याची आई त्याला ड्रग्ज देऊन अभ्यास करण्यास भाग पाडते. त्याचबरोबर पालक समितीच्या अध्यक्षांना विविध भेटवस्तू देऊन त्यांना आपल्या बाजूने ठेवण्याचा प्रयत्न करते.

एका शाळेतील हुशार आणि अव्वल क्रमांकाच्या विद्यार्थ्याने सर्वांत लोकप्रिय शिक्षकावर हात उचलल्यामुळे त्याचीच बदनामी होते. मात्र त्याने असे टोकाचे पाऊल का उचलले, यामागचे सत्य उलगडत जाते.

सोशल मीडियाचा वापर करून काही विद्यार्थी आपल्या शिक्षकांची बदनामी करतात आणि त्यांना आत्महत्येस प्रवृत्त करतात. तरीही संबंधित विद्यार्थ्यांवर कोणतीही कारवाई होत नाही; उलट समाजात शिक्षकांचीच प्रतिमा खराब होते.

किशोरवयीन विद्यार्थ्यांना कायद्याकडून मिळणाऱ्या संरक्षणाचा गैरफायदा घेत काही विद्यार्थी चोरी, ड्रग्ज विक्री आणि इतर गुन्हे करतात. पकडले गेल्यावर केवळ माफी मागून ते सहज सुटतात.

या सर्व प्रकरणांचा ERPB यशस्वीपणे तपास करून त्यांची उकल करते. मात्र या विभागाला विरोध करणारे काही प्रभावशाली लोकही असतात. ते सतत ERPB विरुद्ध कारवाया करून या युनिटला अडचणीत आणण्याचा प्रयत्न करतात. अखेरीस ते या विभागाला बंद करण्यातही यशस्वी होतात; पण त्यानंतर घडणाऱ्या घटनांमुळे कथेला एक वेगळेच वळण मिळते.

विद्यार्थ्यांच्या समस्या, शिक्षकांची हतबलता, राजकारणी आणि उद्योगपतींचा शाळांमधील हस्तक्षेप, तसेच कायद्याच्या संरक्षणामुळे मनमानी करणारे विद्यार्थी अशा अनेक गंभीर विषयांवर ही मालिका भाष्य करते. त्यामुळे ही कथा कुठेतरी भारतीय शिक्षण व्यवस्थेतील समस्यांशीही नाते सांगताना दिसते.

प्रत्येक विद्यार्थी, शिक्षक आणि पालकांनी आवर्जून पाहावी अशी ही उत्कृष्ट मालिका आहे. ही मालिका नेटफ्लिक्सवर हिंदी भाषेत उपलब्ध आहे.