सिकॅमोर रो

सिकॅमोर रो .....जॉन ग्रिशॅम

अनुवाद...सुदर्शन आठवले 

मेहता पब्लिशिंग हाऊस

सेथ हबर्डने अतिशय शांत डोक्याने आणि व्यवस्थित प्लॅन करूनच आत्महत्या केली होती.आपल्या आत्महत्येनंतर पुढे काय कृती करायची तेही स्वतःच्या हस्ताक्षरात लिहून ठेवले होते.ते अफाट संपत्तीचे मालक होते. त्यांचे दोन घटस्फोट झाले होते.मुले होती.

पण ते एकटेच आपल्या मोठ्या इस्टेटीत राहत होते.कित्येक वर्षे त्यांनी मुलांशी संबंध ठेवले नव्हते.नाही म्हणायला त्यांना एक भाऊ होता पण तोही अनेक वर्षे बेपत्ता होता. 

 कृष्णवर्णीय लेटी लॅग ही त्याची  मोलकरीण. सेथ हबर्डना कर्करोग होता.ते फार काळ जगणार नव्हते .आजारपणात लेटीच त्यांची सेवा करत होती.मिसिसिपी राज्यात अजूनही गौरवर्णीय आणि कृष्णवर्णीय असा भेदभाव चालूच होता.

जेक ब्रिगन्स वकील होता.तो फक्त सेथ हबर्डचे नाव ऐकून होता. तो प्रत्यक्षात त्यांना कधीही भेटला नव्हता.आत्महत्येच्या दुसऱ्या दिवशी त्याला पत्र आले. तो सेथ हबर्डचे पत्र वाचून आश्चर्यचकित झाला.सेथ हबर्डने त्यांच्या मृत्यूपत्राची जबाबदारी त्याच्यावर सोपवली होती. 

पण मृत्युपत्र वाचून तो हादरला.मृत्यूपत्रात हबर्ड यांनी आपली 90% मालमत्ता लेटी लॅगच्या नावावर केली होती तर 5%आपला बेपत्ता भाऊ आणि 5%चर्चला दिली होती.साधारण पंचवीस दशलक्ष डॉलर एकूण मालमत्ता होती असा अंदाज सगळ्यांना होता.

90% मालमत्ता एका कृष्णवर्णीय मोलकरणीला मिळणार हे कोणालाच मान्य होणार नव्हते. हबर्डचे कुटुंबीय कोर्टात जाणार हे नक्की.आता संघर्ष अटळ होता. यात जेकची कसोटी लागणार होती.आधीच तो कृष्णवर्णीयांचा  वकील म्हणून प्रसिद्ध होता. त्याच्या समोर कोणती संकटे कशी उभी राहतील याची त्याला काहीच कल्पना नव्हती.पण त्याच्यावर मृत्युपत्राचे पालन करण्याची जबाबदारी होती आणि तो प्रामाणिकपणे आपली जबाबदारी पार पाडणार होता.

 समोर फारच तगड्या वकिलांची टीम आहे. तो त्यांच्यासमोर उभा राहू शकेल ? लेटी लॅगला मृत्युपत्राप्रमाणे तिचा हिस्सा मिळेल का ? एक उत्कंठावर्धक कोर्टरूम नाट्य वाचायला हवेच .