हग डे

हग डे

खाडकन आवाज येताच आख्या बाजाराचे लक्ष त्या दिशेने गेले.भर गर्दीत ती संतापून त्याच्याकडे पाहत होती आणि तो खाली मान घालून उभा होता.

"तुझी लायकी तरी आहे का माझ्याकडे पहायची...?? आणि तरीही आज हॅपी हग डे म्हणत मिठी मारायची हिंमत केलीस...?? लाजशरम काही आहे का ...?? की दिसली तरुणी की मिठी मारायला धावत यायचे. इथे भर रस्त्यात चपलेने मारेन तुला.. पुन्हा माझ्या वाट्याला गेलास तर ..संतापाने थरथरत ती बोलत सुटली होती.

टाईट जीन्स त्यावर मॅचिंग शॉर्ट कुर्ता तिच्या गोऱ्या शरीराला खुलून दिसत होता. पाहणारा नक्कीच पुन्हा वळून पाहिलं अशी तिची शरीरयष्टी होती. संतापाने तिचा चेहरा लाल झाला होता आणि त्यातही ती अजून सुंदर दिसत होती.

 तो तिच्यासमोर केविलवाणा चेहरा करून उभा होता. साधी ट्राऊझर त्यावर गोल गळ्याचा साधा टी शर्ट .पायात चप्पल . साधारण बावीस वर्षाचा असेल. मित्रांसोबत नेहमी त्या नाक्यावर उभा असायचा . पण कधी कोणी त्याला थट्टा मस्करी करताना पाहिले नव्हते .

ती बऱ्याचवेळा बाजारात यायची . तिला कधीच यांचा त्रास नव्हताच. त्यांच्या जवळून जाताना ओळखीची चमक तिच्या डोळ्यात यायची . बस इतकेच ....

पण आज त्याने अचानक समोर येऊन हॅपी हग डे म्हणत तिला मिठी मारली आणि तिचा तोल गेला. त्याच रागात एक सणसणीत गालावर ठेवून दिली तिने आणि मग तोंड सोडून संतापाला वाट करून दिली होती.

काही वेळाने ती निघून गेली आणि बाजार पूर्वीप्रमाणे सुरू झाला . आताच काही घडलंय याची नावनिशाणीही शिल्लक नव्हती. 

तो रुबाबात आपल्या मित्रांसमोर उभा राहिला."चला.. काढा पाच हजार.. मी पैज जिंकलोय." मित्रांनी काही न बोलता पाच हजार काढून त्याच्या हातात दिले.

"उगाच पैज लावू नका.सध्या कोणतीही पैज काहीही करून जिंकायची अशी परिस्थिती आहे माझी..."तो हसून म्हणाला .

व्हॅलेंटाईन डे सुरू झाले होते. रोज कोणतातरी डे येत होता. आज हग डे.….

गमतीत त्याच्या मित्रांनी पैज लावली होती. आपल्या आवडत्या मुलीला जो हग करेल त्याला पाच हजार रु मिळणार होते.

ती नेहमी दिसायची म्हणून आज त्याने हे धाडस केले होते.अर्थात त्याचा परिणाम अपेक्षेपेक्षा जास्तच गंभीर झाला होता.

संध्याकाळी तो घरात शिरला.नेहमीसारखेच तणावग्रस्त वातावरण होते. ते नसते तर त्याला आश्चर्य वाटले असते. आजी आजोबा कोपऱ्यात बसून हळू आवाजात गप्पा मारत होते. तर बाप शांतपणे शिलाई मशीन चालवत होता.

तो आजीआजोबांच्या समोर उभा राहिला . खिशातून पाकीट काढून त्याने दोघांसमोर ठेवले. 

"तुमची अष्टविनायक यात्रेची तिकिटे. परवा सकाळी निघायचे आहे तुम्हाला. यात्रा कंपनी सगळी काळजी घेईल तुमची....."

एका क्षणात कुजबुज बंद झाली .शिलाई मशीनही पटकन थांबली.थरथरत्या हाताने आजोबांनी ते पाकीट उघडले.आत यात्रा कंपनीची पावती होती. संपूर्ण यात्रा पाच हजारात होती.डोळ्यात अविश्वास आणून आजी आजोबा त्याकडे पाहत बसले.

"आजोबा .... कित्येक वर्षे अष्टविनायक यात्रेचे स्वप्न बघताय....यावर्षी मनात ठरवून ठेवले होते काहीही करून तुमचे हे स्वप्न पूर्ण करायचे. आज पैसे मिळाले आणि ताबडतोब बुकिंग करून आलो.मस्तपैकी फिरून या दोघे .व्हॅलेंटाईन डे साजरा करा .... च्यायला आयुष्यात आहे काय अजून ... " डोळ्यातील अश्रू लपवत तो मोठ्याने म्हणाला.

खुश होऊन आजी आजोबाने त्याला जवळ घेतले . हग डे म्हणजे नक्की काय ते आता त्याला कळले .

© श्री. किरण कृष्णा बोरकर