एक देवी अशीही ....२

एक देवी अशीही ....२
"हे बघ.... ही कंपनी आहे. कुठल्या देवाचे मंदिर नाही...अनवाणी फिरायला.." अनवाणी पायांनी आत शिरणाऱ्या तिला पाहून सुपरवायझर मॅडम ओरडली.
" आहो मॅडम ...नवरात्र चालू आहेत.अनवाणी चालायचे व्रत असते.दरवर्षी करतो आम्ही . सर्वच ऍडजस्ट करतात .तुम्हालाच प्रॉब्लेम आहेत .."ती चिडून म्हणाली.
"ही असली थेर माझ्या डिपार्टमेंटमध्ये नको.हे व्रत उपवास ,रोज ठराविक रंगाचे कपडे वगैरे घरी बसून  करा.नऊ दिवस युनिफॉर्मची सूट दिलीय मॅनेजमेंटने ते पुरे नाही का ...?? मॅडम चिडून म्हणाल्या.'सुरक्षिततेचे नियम सगळ्यांना सारखेच लागू आणि आधी पोटाचे बघा... मग हे व्रत..उपवास .."
"अरे देवा...मॅडम काय ऐकणार नाहीत.दरवर्षी अनवाणी पायाचे व्रत असते .पण यावर्षी खरे नाही".ती मनात म्हणाली.
"दिलेले शूज चढव आणि आत ये ..सुटल्यावर जा अनवाणी ....रस्त्यावरच्या घाणीत पाय देत  तोंडाने देवीचे नाव घेत...." मॅडम डोळे वटारत म्हणाल्या.
काही न बोलता तिने लॉकरमधून शूज काढले मनातल्या मनात देवीची माफी मागितली आणि कामाला सुरुवात केली.डिपार्टमेंटमधील सगळ्या मुली चिडलेल्या होत्या. सुपरवाझर मॅडम दगड आहेत असेच सर्वांचे मत झाले .एक स्त्री असून इतर स्त्रियांच्या भावना समजून घेत नाही .देव तर मुळीच मानत नाहीत त्या.. असे म्हणत सर्वजणी हव्या तश्या तोंडसुख घेत होत्या.तिच्या कानावर येत होते ते ...पण ती लक्ष देत नव्हती .जगण्यासाठी फक्त देव.. देव उपास ...व्रतवैकल्य..करून भागत नाही तर कष्ट करावे लागतात यावर तिचा विश्वास होता.बायकांच्या उतरलेल्या चेहऱ्याकडे पाहत तिने निराशेने मान हलवली आणि कामात गढून गेली.
दुपारी लंच झाल्यावर पुन्हा कामाला सुरुवात झाली.  अनवाणी व्रत तोडल्याचा राग अजूनही तिच्या मनातून गेला नव्हता. टेबलावरील मटेरियल संपले म्हणून ती नवीन मटेरियल घ्यायला उठली आणि तोल गेला . स्वतःला  सावरायच्या नादात तिचा हात टेबलावरील काचेच्या  बरणीला लागला आणि ती डायरेक्ट तिच्या पायावर पडली.आतील ऍसिड सारखा दिसणारा द्रव पदार्थ तिच्या पायावर पडला.तोंडातून निघणारी किंकाळी ती रोखू शकली नाही .सर्वजणी धावत तिच्याभोवती गोळा झाल्या.मॅडमने सर्वाना बाजूला करून तिचा पाय आपल्या मांडीवर घेतला.अलगद तिच्या पायातून शूज काढले.आतमध्ये पाय थोडा सुजला होता."दुखतय का बाळा.... ?? तिने हळुवारपणे प्रश्न केला .मॅडमच्या या प्रेमळ प्रश्नानेच तिचा बांध फुटला .डोळ्यातील अश्रू तिला रोखता आले नाहीत .फर्स्टएड मधील मलम  पायाला लावून तिला एका कोपऱ्यात बसविले. शिफ्ट संपल्यावर मॅडमने तिला आपल्या गाडीवरून घरापर्यंत सोडले . निघताना आपल्या पर्समधून देवीचा गुलाल तिच्या कपाळाला लावला . माता तुझे रक्षण करो असे म्हणून  स्कुटर चालू केली  त्या दूर जाणाऱ्या एका वेगळ्या देवीकडे पाहताना तिचे हात आपोआप जोडले गेले.
© श्री. किरण कृष्णा बोरकर