पिशवीभर आनंद ...अनघा किल्लेदार
लोकव्रत प्रकाशन
अनघा मॅडम आणि मी फेसबुक मित्र .तसे आम्ही एका ग्रुपचे एकत्र अडमीनही आहोत.फोनवर बऱ्याचवेळा बोलणे ही होते. त्यांच्या कथांचे पुस्तक प्रकाशित होतेय हे ऐकून खूप आनंद झाला . पुस्तक प्रकाशन झाले आणि त्याची एक प्रत माझ्या घरी आली.
पिशवीभर आनंद हा त्यांचा कथासंग्रह नावाप्रमाणेच आनंद देणारा आहे . मॅडमची लिखाण शैली खूप साधी सरळ आणि सकारात्मक आहे .
एकूण पंचवीस कथांचा हा संग्रह छोट्यांपासून जेष्ठांपर्यंत संगळ्यानी वाचवा असाच आहे.
आपल्याकडून नकळत अश्या काही गोष्टी घडतात ज्यातून सर्वाना क्षणभरासाठी का होईना एक आनंद मिळतो एक समाधान मिळते आणि डोळे पाणावतात .अश्या छोट्याछोट्या गोष्टी मॅडमनी लिहिल्या आहेत.
या कथासंग्रहातील काही कथा आधीच सोशल मीडियावर खूपच प्रसिद्ध झाल्या आहेत .
पिशवीभर आनंद या कथेत आपल्याकडील खरेदी कुपन नवीन जोडप्याला देऊन त्यांच्या छोट्या छोट्या वस्तूंनी पिशवी भरलेली पाहून वृद्ध दांपत्याचा आनंद लेखिकेने बरोबर टिपला आहे .
महाराजांच्या नावाचा वापर करून होणारी फसवणूक गमतीदार शैलीने त्यांनी महाराजांच्या घोड्याचा नाल या कथेत मांडली आहे .वाचून आपणही त्या फसवणुकीचा आनंद घेतो.
या संग्रहातील कोणत्याही कथेत नकारात्मकता नाही.लेखिका तुम्हाला कोणतेही समाज प्रबोधन करीत नाही. तुम्हाला कोणताही उपदेश देत नाही तर कुटुंबात घडणाऱ्या छोट्याछोट्या गोष्टीत किती आनंद असतो हेच सांगतात.वादग्रस्त मुद्दे,राजकारण लेखिकेने टाळले आहेत वादग्रस्त विषयांवर लिहिलेही नाही .कोणतीही कथा कंटाळा येईल इतकी लांबलेली नाही .त्यामुळे वेळ मिळेल तश्या ह्या कथा वाचू शकतो.
नवीन पिढीही आपल्या कुटुंबविषयी किती जागरूक आणि कर्तव्यदक्ष आहे इतकेच नव्हे तर त्यांना सामाजिक जाणीव ही आहे हे त्यांनी आपल्या काही कथेतून मांडले आहे .
No comments:
Post a Comment