बहिर्जी ..स्वराज्याचा तिसरा डोळा

बहिर्जी ..स्वराज्याचा तिसरा डोळा

लेखक.ईश्वर त्रिंबकराव आगम

शिवरायांच्या अनेक शिलेदारांविषयी आपण वाचले आहे. त्यांचा पराक्रम अनेक मालिकेतून.. चित्रपटातून पाहीला आहे. बहिर्जी नाईक हे नाव आपण नेहमी ऐकतो. महाराजांचा अतिशय विश्वासू साथीदार .लहानपणापासूनच सोबती. गुप्तहेरखात्याचा प्रमुख.

महाराजांच्या प्रत्येक मोहिमेत त्याने प्रमुख भूमिका बजावली होती. पण या शिलेदारांविषयी फारच कमी बोलले जाते. त्याचा विस्तृत पराक्रम कोणालाच माहीत नाही. इतिहासात त्याच्याविषयी फारच कमी लिहिले गेले आहे . कदाचित हेच त्याचे जातिवंत गुप्तहेर असण्याचे लक्षण असावे.

अश्या बहिर्जी नाईकची माहिती लेखकाने या पुस्तकात आपली कल्पनाशक्ती वापरून लिहिली आहे. हे पुस्तक दोन भागात लिहिणार असल्याचे लेखक स्पष्ट करतो . त्यातील हा पहिला भाग.

यात आपल्याला बहिर्जी नाईकचे बालपण कळते. त्याचा स्वभाव ,त्याचे मित्र. याची माहिती मिळते.

बहिर्जी  जाधव रामोशी जातीतला. अतिशय हुशार चपळ आणि काटक . त्याची निरीक्षणशक्ती अफाट होती. तो उत्कृष्ट नकलाकार होता .

शिवाजी महाराजांनी शेताची नासाडी करणाऱ्या रानडुक्कर...लांडगे... मारणार्यांना सोन्याचे कडे इनाम म्हणून देण्याचे जाहीर केले.तेव्हा बहिर्जी आणि त्याच्या मित्राने अतिशय कौशल्याने चार पाच रानडुकरे आणि दोन लांडगे मारून जिजाबाईंकडून इनाम घेतले आणि नंतर आपल्या निरीक्षणशक्तीची कमाल शिवाजी महाराजांना दाखवली . त्यांनी खूष होऊन बहिर्जीला आपल्या मित्रमंडळीत सामील करून घेतले .तेव्हापासून त्याने स्वराज्याच्या प्रत्येक मोहिमेत मोलाचे योगदान दिले.

पुस्तक छान आहे पण बहिर्जी नाईकांच्या कामगिरीची विस्तृत माहिती मिळत नाही .