गोष्ट तुझी माझी

गोष्ट तुझी माझी

वैभव दिलीप धनावडे 

साहित्यसंपदा प्रकाशन

साहित्यसंपदा समुहाचे अध्यक्ष वैभव धनावडे यांचा हा कथासंग्रह आहे. भारतीय समाजात आणि साहित्यात स्त्रियांना फार मोठे स्थान आहे. ती समाजात वेगवेगळ्या भूमिका निभावते. येईल त्या परिस्थितीला सामोरे जाते.कधी आक्रमण करते तर कधी दोन पावले माघार घेते.ती शरण ही जाते पण त्यामागे निश्चित काही कारणे असतात. अश्याच काही स्त्रियांच्या एकवीस कथा या कथासंग्रहात आहेत.यातील काही कथा त्यांच्या संपर्कात असलेल्या काही स्त्रियांवर आहेत.

एक स्त्री जी पत्नी बनून नव्या घरात येते तेव्हा तिला काय नवीन अनुभव येतात तिचे माहेरचे नियम आणि सासरचे नियम यात फरक असतो.ती कशी ऍडजस्ट करून घेते. 

ती आई बनते तेव्हा मुलांना सांभाळून नोकरी आणि घर सांभाळायची कसरत कशी करावी लागते ?

आपल्या छंदाकडे नवरा लक्ष देत नाही तरीही ते जोपासणारी स्त्री.

एक दिवस घरातली कामे न करता झोपून राहून स्वतःची किंमत इतरांना करून देणारी गृहिणी.

तर वेगवेगळी संकटे येऊनही पुन्हा पुन्हा त्याच जोमाने उभी राहणारी स्त्री.

अश्या अनेक नायिका वैभव सरांनी आपल्यासमोर उभ्या केल्या आहेत. यात एक वेगळेपणा म्हणजे त्यांच्या सर्व कथांच्या नायिकेचे नाव अश्विनी आहे.

अश्विनीच समाजातील सर्व थरातील स्त्रियांच्या भावनांचे प्रतिनिधित्व करते. यातील एक दोन कथा मला आवडल्या नाहीत.कदाचित मला समजल्या नाहीत.पण बाकीच्या कथा छानच आहेत.

माझ्या मते हा कथासंग्रह अपूर्ण आहे.त्यांनी भारतीय समाजातील पुरुषांवर गोष्ट तुझी माझीचा दुसरा भाग काढून वर्तुळ पूर्ण करावे.