इग्लोरीयस बास्टर्ड.

इग्लोरीयस बास्टर्ड...2005

INGLORIOUS BASTERDS

1941

फ्रान्समधील एका छोट्या सुंदर गावात तो शेतकरी आपल्या तीन मुलींसमावेत सुखाने राहत होता . दुसरे महायुद्ध सुरू होते आणि जर्मन सेनेने फ्रांस ताब्यात घेतला होता .अचानक एक दिवस एक जर्मन अधिकारी  कर्नल हांस आपल्या काही सैनिकांना घेऊन त्या शेतकऱ्याच्या  दारात उभा राहिला . कर्नल हांसला  ज्यू हंटर असे टोपण नाव दिले होते.ज्यूना शोधून त्यांचा खातमा करणे हेच त्यांचे प्रमुख काम होते .कर्नल  हांसने अति सभ्यतेचा आव आणत चेहऱ्यावर मिश्किल मित्रत्वाचे हासू खेळवत त्या शेतकऱ्याकडे ज्यूंची चौकशी करू लागला . शेवटी त्याने हतबल होऊन जमिनीखाली लपलेल्या ज्यूंच्या जागेकडे बोट दाखविले. काही क्षणात सैनिकांनी गोळीबार करून त्या ज्यू कुटुंबाला संपविले . पण त्यातील एक ज्यू मुलगी निसटली .

चार वर्षानंतर त्या ज्यू मुलीने पॅरिसमध्ये एक चित्रपटगृह चालवायला घेतले . एक जर्मन अधिकारी फ़ॅड्रीक झोलर ज्याने एकट्याने  तीन दिवसात जवळजवळ तीनशे ब्रिटिश अमेरिकन सैनिक मारले होते तिच्या प्रेमात पडला.जोसेफ गोबल्स हिटलरचा खास माणूस. त्याने अनेक जर्मन चित्रपटाची निर्मिती केली होती. त्याने त्या जर्मन अधिकाऱ्यावर अ नेशन प्राईड नावाचा चित्रपट काढला. त्या चित्रपटाचा प्रीमियर त्या मुलीच्या चित्रपटगृहात व्हावी अशी झोलरची इच्छा होती . ती गोबल्सने मान्य केली .

 इग्लोरीयस बास्टर्ड हे अमेरिकेचे छुपे सैनिकी युनिट होते. यात ज्यू सैनिकांचा भरणा होता . युनिफॉर्म घातलेल्या प्रत्येक नाझी सैनिकाला मारणे हेच त्यांचे काम.त्या युनिटची दहशत प्रत्यक्ष हिटलरलाही होती.लेफ्टनंट अल्डो राईन युनिट प्रमुख होता .

 अ नेशन प्राईड पाहायला प्रत्यक्ष हिटलर येणार होता .त्याच्या सोबत  गोरिंग ,बोरमन  मंडळीही हजर राहणार होती. त्यामुळे चित्रपटगृहात जाऊन या सर्वांना ठार करण्याची योजना आखली गेली आणि  इग्लोरीयस बास्टर्डवर ही कामगिरी सोपविण्यात आली. कर्नल  हांस या योजनेतील प्रमुख अडसर होता .त्याची नजर प्रत्येकावर होती.

ही कामगिरी यशस्वी होईल का ..?? हिटलरला मारण्यासाठी अजून कितीजणांनी योजना आखल्यात ?? कोणाची योजना यशस्वी होईल ..??

चित्रपटात लक्षात राहतो तो कर्नल  हांस लांडा. ख्रिस्तोफ वॉल्टझने हांसची भूमिका केली आहे.थंड रक्ताचा ,क्रूर आणि मनात काही ठाम ठरवून अतिसभ्य आणि नम्रपणाचा आव आणणारा कर्नल त्याने प्रभावीपणे उभा केला आहे . इग्लोरीयस बास्टर्डचा प्रमुख लेफ्टनंट अल्डोची भूमिका ब्रॅन्ड पिटने केली आहे . त्याची भूमिका छोटी आहे .

चित्रपटात लक्षात राहतात ही भयानक दृश्य. डोक्याची कातडी सोलणे, बेसबॉल बॅटने डोके फोडणे .कपाळावर चाकूने नाझीचे स्वस्तिक रेखाटने अशी काही क्रूर दृश्य चित्रपटात पाहताना अंगावर शहारे येतात .

चित्रपट नेटफ्लिक्सवर आहे.