कानविंदे हरवले
हृषीकेश गुप्ते
मॅजेस्टिक पब्लिशिंग हाऊस
खरे तर मिसेस कानविंदेचा तो फोन मिहीर इनामदारने घेतला नसता तर पुढच्या घटना कदाचित टळल्या असता.पण जे घडणार आहे ते टाळू शकत नाही.
वासुदेव कानविंदे हे सिनेमा जगतातील मोठे नाव.अर्थात मिहीर इनामदारही त्याच क्षेत्रात आर्ट डायरेक्टर होता म्हणून कानविंदेला नावाने ओळखून होताच.कानविंदे हे प्रसिद्ध ध्वनी संयोजक ,डायरेक्टर आहेत.
त्या दिवशी अचानक एका अनोळखी नंबर वरून मिहीरला फोन आला .कानविंदे हरवले आहेत असे त्यांची पत्नी म्हणत होती.
खरे तर मला का फोन केला ?? माझा काय संबंध ? असे अनेक प्रश्न मिहीरला पडले होते.
आठ दिवसांपूर्वी पहिल्यांदाच त्याला कानविंदेचा फोन आला होता.पण त्या फोनवर काय बोलणे झाले तेच मिहीरला आठवत नव्हते.
मिसेस कानविंदेच्या आग्रहावरून मिहीर त्यांना भेटायला गेला, तेव्हा तिने त्याच्या हातात एक लिफाफा ठेवला. त्यात जुन्या व्हिडिओ कॅसेट लायब्ररीची रिसीट होती. त्यात कानविंदेने एक व्हिडिओ कॅसेट भाड्याने घेतल्याची सही होती.पण अजून दोनजणांनी तीच कॅसेट भाड्याने घेतल्याची नोंद होती. कॅसेट लायब्ररीचा पत्ता मुंबईचा होता. सर्वात धक्कादायक गोष्ट म्हणजे त्या कार्डवर तिसरे नाव मीर इनामदार उर्फ मिहीरचे होते.सहीही त्याचीच होती.पुण्यात राहणारा मिहीर मुंबईत जाऊन व्हिडीओ कॅसेट भाड्याने का घेईल ?
आता मात्र मिहीर गोंधळात पडला .पण व्हिडिओ कॅसेट लायब्ररीचा मालक मुश्ताकभाई होता.जे मिहीरचा बालपणीचा मित्र इनायतचे वडील होते. पण कार्डवर तारीख चौऱ्याणव सालातील होती आणि तेव्हा मिहीर सोळा वर्षाचा होता.
आता मिहीरला मोरब्याला जाऊन मुश्ताकभाईला भेटावेच लागणार होते .कारण त्या कार्डवर लिहिलेली व्हिडीओ कॅसेट महत्वाची होती. त्याच कॅसेटच्या मागे कानविंदे होते.
काय आहे कानविंदेचे रहस्य ? ते कुठे हरविले आहेत ? त्यांचा मिहीर इनामदारशी काय संबंध ??
एक अतर्क्य ,गूढ आणि लेखकाच्या नेहमीच्या शैलीला साजेशी अशी गूढरम्य कादंबरी .
