बेकेट

बेकेट

BECKETT

 बेकेट आणि एप्रिल एक प्रेमी युगुल सुट्टी साजरी करायला ग्रीसला आलेत. अथेन्स शहरात राजकीय अराजकता असल्यामुळे ते अथेन्सपासून दूर एका गावी जातात.रात्री परतत असताना बेकेटच्या डोळ्यावर झापड येते आणि त्यांच्या कारचा भयानक अपघात होतो. कार रस्ता सोडून एका घरावर आढळते.बेशुद्ध होण्यापूर्वी बेकेटला एप्रिल जखमी झालेली दिसते.त्याला घरात एक सोनेरी केसांचा मुलगा आणि स्त्री दिसते तो त्यांच्याकडे मदत मागतो पण ती स्त्री मुलाला बाहेर घेऊन जाते.

शुद्धीवर येतो तेव्हा एप्रिलचा मृत्यू झाल्याचे त्याला कळते.जबानी देताना तो पोलिसांना त्या घरात एक मुलगा आणि स्त्री असल्याचे सांगतो.पोलिसांच्या मते त्या घरात कोणीच नव्हते.

दोन दिवसांनी बेकेट पुन्हा त्या अपघातस्थळी जातो.एप्रिलचा मृतदेह जिथे पडला होता तिथे तो जाऊन उभा राहतो तेव्हा अचानक त्याच्यावर गोळी झाडली जाते. तो आश्चर्यचकित होतो आणि पळतो. बाहेर त्याची जबानी घेतलेला पोलीस अधिकारी आणि एक तरुण स्त्री त्याच्यावर गोळ्या झाडत असतात.तो जीव वाचवायला जंगलात उंच पहाडावर चढतो.तिथून तो गावकऱ्यांच्या मदतीने अमेरिकी दूतावासात फोन करतो . अमेरिकन दूतावास त्याला अथेन्सला यायला सांगते .

आता बेकेटला त्या पोलीस अधिकाऱ्यांना चुकवून अथेन्सला जायचे आहे.तो कसा तिथे पोचतो हे बघण्यासारखे आहे.पण तिथे पोचल्यावरही त्यांच्यावरील संकटे दूर होत नाहीत .

हे सर्व काय आहे ?? का पोलीस त्याच्या जीवावर  उठलेत ?? तो मुलगा खरोखर अस्तित्वात आहे का ??त्याचा बेकेटशी काय संबंध आहे ??

सुरवातीची दहा मिनिटे प्रेमकथा वाटणारा हा चित्रपट अचानक आपल्याला धक्के देतो आणि बेकेटसोबत आपणही त्या पाठलागात सामील होतो.

चित्रपट नेटफ्लिक्सवर हिंदी भाषेत आहे.