जॉन विक
JOHN WICK
एखाद्याला आपण करत असलेले वाईट काम सोडून एक सरळ साधे आयुष्य जगायचे आहे .पण ते किती कठीण आहे आणि त्यावर चार भागाचा चित्रपट बनू शकतो हे जॉन विक पाहिल्यावरच कळते.
जसे नेहमीसारखे जग आहे तशीच गुन्हेगारांची एक काळी दुनिया आहे. ती टेबल या नावाने ओळखली जाते.अनेक कुप्रसिद्ध मारेकरी या टेबलसाठी काम करीत असतात. जगभर या टेबलची ठिकाणे आहेत.हॉटेल्स आहेत.तसेच टेबलचे काही नियमही आहेत आणि ते सर्वांनीच काटेकोरपणे पाळायचे असतात.
टेबल आपल्या मारेकऱ्यांना संरक्षणही देते तर नियमाविरुद्ध वागल्यास ठारही मारते. टेबलच्या ऑफिसमध्ये, हॉटेल्समध्ये हाणामारी करायची नाही तर ज्यांनी आश्रय घेतलाय त्यांना ठार मारायचे नाही असाही नियम आहे. एखाद्या व्यक्तीला ठार मारल्यानंतर त्याच्या मृतदेहाची विल्हेवाट लावायची यंत्रणाही टेबलकडे आहे.
ज्यांना एखाद्याला ठार मारायचे आहे ते टेबलकडे सुपारी देतात आणि आपल्या यंत्रणेमार्फत टेबल मारेकऱ्याची निवड करते. कधी कधी ही सुपारी ओपन असते म्हणजे कोणताही मारेकरी टार्गेटला मारू शकतो.
जॉन विक हा टेबलचा सर्वोकृष्ठ मारेकरी आहे .त्याची पत्नी वारल्यावर तो या कामातून बाहेर पडायचे ठरवितो. त्याच्या पत्नीने मरणापूर्वी एक कुत्रा त्याला गिफ्ट दिलेला असतो.आता कुत्राच जॉनचा मित्र,सोबती आहे.त्याचे आयुष्य व्यवस्थित चालू आहे पण एके दिवशी सहज झालेल्या धक्काबुक्कीचे पर्यवसन जॉनच्या कुत्र्याच्या मरणात होते.
आपल्या प्राणप्रिय कुत्र्याच्या मृत्यूचा बदला जॉन त्यांना ठार मारून घेतो.पण विषय तिथेच संपत नाही.मग सुरू होते मोठे युद्ध. स्वतःचा जीव वाचविण्यासाठी जॉनला नाईलाजाने लढावे लागते. मागावर असलेल्या मारेकऱ्यांचा जीव घ्यावा लागतो . यात तो टेबलच्या नियमांचे उल्लंघन करतो आणि टेबल त्याच्या विरुद्ध जाते.या युद्धाचे आतापर्यंत एकूण चार भाग आलेत.प्रत्येक भाग सरस आहेत.
जॉन विकच्या प्रत्येक भागात प्रचंड हाणामारी आहे ,रक्ताचे पाट वाहिले जातात.अटीतटीच्या मारामारी आहेत.गोळीबार आहे.हातात येईल त्या वस्तूने समोरच्याचा जीव घेतला जातो .
अंगावर काटा आणणारा चित्रपट लायन्सगेट वर उपलब्ध आहे.
No comments:
Post a Comment