अग्लीस

UGLIES

 अग्लीस

ही कथा आहे भविष्यातील जगाची. नैसर्गिक स्रोत नष्ट झाले आहेत. त्यामुळे आता सर्व रेडिमेड मिळते. सिटी नावाचे जग आहे जे अतिशय सुंदर आहे.पण त्या जगात जाण्यासाठी सोळा वर्ष पूर्ण व्हावी लागतात .त्या आधी त्या मुलांना अग्ली म्हटले जाते.सोळा वर्ष पूर्ण झालेल्या तरुण तरुणींवर एक शस्त्रक्रिया केली जाते .त्यामुळे त्यांना आजुबाजूला फक्त आनंद दिसतो. त्यांच्यातील इतर भावना नष्ट होतात.

टॅली आता सोळा वर्षे पूर्ण करणार आहे .ती सिटीमध्ये जाण्यासाठी आतुर आहे.तिने तिच्या केसांचा आणि डोळ्यांचा रंग ही निश्चित केलाय.त्या आधी तिचा मित्र पॅरिस सिटीमध्ये गेलाय आणि त्याच्यावर शस्त्रक्रिया झालीय.

शाय नावाची तरुणी आता टॅलीची मैत्रीण आहे .ती टॅलीला छापील पुस्तक वाचायला देते जे तिच्यासाठी नवीन आहे . मग ती तिला स्मोक या जगाविषयी सांगते .स्मोकमध्ये नातेसंबंध आहेत .तिथे पाणी आहे .लोक शेती करून अन्न पिकवतात .म्हणजेच तिथं नैसर्गिक स्रोत आहेत.पण सिटी  स्मोकला मानीत नाही .ते स्मोकला नष्ट करायला बघत असतात.डॉ.केबल सिटीची प्रमुख आहे .कोणावर शस्त्रक्रिया करायची हे तीच ठरवते.

डेव्हीड स्मोकमध्ये राहतो .तो बहुसंख्य तरुणांना स्मोकमध्ये आणायचा प्रयत्न करतो .शाय स्मोकमध्ये जाते.जाण्यापूर्वी ती टॅलीला स्मोकमध्ये जाण्याचा मार्ग सांगते.

एक अग्ली तरुणी नाहीशी झालीय हे  डॉ.केबलला समजते. ती टॅलीची शस्त्रक्रिया थांबविते आणि शायला स्मोकमधून परत आणायला सांगते .यासाठी पॅरिस डॉ केबलच्या पाठीशी असतो.

टॅलीमार्फत स्मोकचे ठिकाण समजले की सगळ्यांना बंदी बनवून स्मोक नष्ट करायची डॉ केबलची योजना असते.

टॅली शायला परत सिटीमध्ये आणेल का ??

डेविड स्मोकला वाचवू शकेल.

अत्याधुनिक तंत्रज्ञान विरुद्ध नैसर्गिक स्रोत यांची लढाई नक्कीच थरारक आहे.

नेटफ्लिक्सवर हिंदी भाषेत हा चित्रपट आहे.सहकुटुंबासोबत बघण्यासारखा हा चित्रपट सर्वाना आवडेल 

द डेव्हिल्स अल्टरनेटिव्ह

द डेव्हिल्स अल्टरनेटिव्ह

फ्रेडरिक फोरसिथ

अनुवाद ..रमेश जोशी 

राजहंस प्रकाशन 

एका छोट्या चुकीमुळे रशियातील गहू उत्पादनात घट झाली .आता रशियाला आपल्या एकूण गहू उत्पादनाच्या सुमारे साडे पाच कोटी टन गहू कमी पडतोय .मोठया दुष्काळाला रशियाला सामोरे जावे लागणार आहे .ही गोष्ट अमेरिकेच्या फायद्याची ठरणार होती . ते गहू देण्याच्या मोबदल्यात अनेक फायदे आपल्या पदरात पाडून घेणार होते.

त्याचवेळी युक्रेनच्या स्वातंत्र्यची लढाई देखील चालू होती.आंद्रे ड्रेक हा इंग्लंडच्या मर्चंट नेव्हीच्या ऑफिसात काम करणारा साधा तरुण कारकून .पण तो खरा युक्रेनियन स्वातंत्र्यसैनिक होता .आपल्या मागण्या मान्य करण्यासाठी त्याने काही साथीदारांना घेऊन एक भयानक योजना आखली .

त्याच्या योजनेनुसार केबीजी च्या प्रमुखाला गोळ्या घालून ठार मारण्यात आले. पण त्यांच्या दुर्दैवाने रशियाने ही बातमी दडवून ठेवली .नंतर त्याच साथीदारांनी विमान अपहरण केले पण तोही डाव फसला आणि त्यांना अटक झाली .त्यांनीच केबीजी प्रमुखाला मारलंय हे रशियाला ठाऊक होते .त्यांची रवानगी तुरुंगात झाली.

जपानमध्ये  फ्रेया नावाचे एक महाकाय तेलवाहू जहाज बनतय.दहा लाख टन तेल वाहून नेण्याची क्षमता या जहाजात आहे .जगातील हे इतक्या क्षमतेच पहिलंच जहाज आहे .थॉर हा नॉर्वेजियन माणूस जहाजाचा कॅप्टन आहे.

दहा लाख टन क्रूड ऑइल भरून  फ्रेया प्रवासाला निघालीय .पण मध्येच ड्रेक आणि त्याचे साथीदार जहाजाचे अपहरण करतात. जहाजातील तेलाच्या टाक्यांना स्फोटके लावतात. ते तुरुंगात असलेल्या आपल्या साथीदारांची  सुटका करून  त्यांना  इस्त्रायला  पोचविण्याची मागणी करतात .

युरोपातील दहा देशांचे भवितव्य फ्रेयावर अवलंबून आहे.दहा लाख टन क्रूड ऑइल समुद्रात पसरले तर किती हानी होईल याचा विचार कोणीच करू शकत नाही .पण दोन कैद्यांची सुटका झाली आणि त्यांनी केबीजी प्रमुखाची हत्या केली आहे असे जाहीर झाले तर युक्रेनचा  स्वातंत्र्यलढा यशस्वी होईल आणि रशियाची नाचक्की होईल अशी भीती रशियाला आहे .आणि सध्या युक्रेनमध्ये जास्त गहू पिकतो .

शेवटच्या क्षणापर्यंत  चालणारे अपहरणनाट्य आपल्याला खिळवून ठेवते.

डोक्याला चालना देणारी एक थरारक कादंबरी .