शिक्षा

शिक्षा

नवीन प्रोजेक्ट हातात आल्यापासूनच त्याचे टाईमटेबल बिघडले होते.प्रोजेक्ट पूर्ण करण्यासाठी रात्रीचा दिवस करावा लागणार होता.घरी जाण्याची वेळ नक्की नव्हतीच.आजही तो रात्री उशिरापर्यंत ऑफिसमध्ये थांबला होता. सर्व आवरून बाहेर पडेपर्यंत रात्रीचे अकरा झाले. नेहमीच्या हॉटेलात दोन पेग मारून पोटभर जेवून तो बाहेर पडला तेव्हा बुक केलेली खाजगी टॅक्सी समोर उभी राहिली.ओटीपी नंबर ड्रायव्हरला देऊन मागच्या सीटवर त्याने स्वतःला झोकून दिले. ठिकाण आले की तो उठवेलच याची खात्री होतीच . काही क्षणातच त्याला डुलकी लागली.

 अचानक त्याला जाग आली . डोळे उघडून पाहिले तर कॅब ड्रायव्हर बाहेर पडून एका मुलीशी बोलत होता . निरखून पाहिले तर ती एक सुंदर तरुणी होती . बाजूलाच तिची ऍक्टिवा उभी होती.

"काय झाले रे ....?? त्याने थोडे चिडूनच विचारले तसा ड्रायव्हर जवळ आला.

"सर तिची  स्कुटर बंद पडली.म्हणून मी थांबलो.."

"ठीक आहे... तिला दुसरी कॅब बघून दे ... "तो चेहऱ्यावर त्रासिक भाव आणत म्हणाला.

"सर...ती मघापासून ट्राय करतेय.पण यावेळी कॅब नाही मिळणार तिला . आपण तिला लिफ्ट देऊया का ...?? तुम्हाला सोडून मी तिला सोडेन . मलाही ताबडतोब भाडे मिळेल.."" ड्रायव्हर म्हणाला.

"अरे बाबा...कशाला नको ती जबाबदारी अंगावर घ्या . पाहिजे तर इथे थांबू दुसरी सोय होईपर्यंत.पण आपल्याबरोबर नको.."तो चिडूनच म्हणाला.

त्याचे बोलणे फारच लांबतेय हे पाहून ती तरुणी पुढे आली आणि कॅबच्या प्रकाशात त्याला स्पष्ट दिसली .अर्थात नेहमीप्रमाणेच आधुनिक वेशभूषा केलेली ती तरुणी होती . चेक्स शर्ट ..जीन्स ..हातात स्मार्ट वॉच ...कानात कॉर्डलेस...पण चेहऱ्यावर भीती नाही . सहजपणे त्याच्याकडे नजर भिडवून पाहत होती . त्यांची नजरानजर होताच ती हसली आणि पुढे आली.

"ठीक आहे.... घे तिला...पण तिला आधी सोडू मग मला ..."

तशी ती थँक्स म्हणत ड्राइव्हरच्या बाजूला बसली.

  अचानक चार तरुण गाडी समोर उभे राहिले.ड्राइव्हरने गाडी सुरू करायचा प्रयत्न केला इतक्यात मागच्या सीटवर बसलेला तो ...रागाने बाहेर आला.

" कोण आहात तुम्ही ..."?? काय पाहिजे तुम्हाला ...?? त्याने  चिडून विचारले. ते चारही तरुण त्याच्या दिशेने सरकू लागले.

" हे बघा... सगळे पैसे घ्या पण आम्हाला सोडा.."ती तरुणी हात जोडीत म्हणाली.

 तसे त्यातील एकाने ड्रायव्हरला निघून जाण्याचा इशारा केला. पडत्या फळाची आज्ञा मानून ड्राइव्हर  त्या तरुणीसह ताबडतोब पसार झाला.काही अंतर जाताच त्या तरुणीने ड्रायव्हरला पोलिसांना फोन करून  ही घटना कळविण्याची विनंती केली.

दुसऱ्या दिवशी सकाळी ती थोडया उशिरानेच उठली . टीव्ही ऑन करून बातम्या पाहत असताना स्क्रिनवर तिला अपेक्षित असणारी न्यूज आली.मल्टिनॅशनल कंपनीत काम करण्याऱ्या एका तरुणाला लुबाडून नंतर हत्या .. हत्येपूर्वी त्या तरुणावर अमानुष बलात्कार झाला . बातमी वाचताच ती हसली.

इतक्यात तिचा मोबाईल वाजला . पलीकडून एक तरुणी बोलत होती . ताई बातमी वाचली का ..?? त्या नराधमाला अशीच शिक्षा पाहिजे . सभ्यपणाचा आव आणत गेले सहा महिने  माझ्यावर अत्याचार करत होता तो . तोंड दाबून ते सहन करीत होते मी . पण तुमच्यामुळे त्याला शिक्षा झाली . तुमचे खूप खूप आभार .भविष्यात असल्या कामासाठी कोणतीही मदत करायला मी तयार आहे ." तिने थँक्स बोलून फोन ठेवला . काही वेळाने पुन्हा फोन हातात घेऊन एक नंबर फिरवला आणि समोरच्याला विचारले आता पुढचा नंबर कोणाचा आहे ..."???

© श्री. किरण कृष्णा बोरकर