वेटिंग
"अजून किती वेळ लागेल ..."?? स्मशानात अंत्यसंस्कार करणाऱ्या कर्मचाऱ्याला त्याने विचारले.
"तरी अजून तीन तास लागतील साहेब...." त्या कर्मचाऱ्याने उत्तर दिले.
"मग दहा मिनिटे आधी फोन कर ..मी येईन .. "त्याने उत्तर दिले आणि निघून गेला.
"काय माणसे असतात.....!! आपला माणूस कायमचा गेलाय तरी त्याच्यासाठी तीन तास थांबू शकत नाहीत .." एकजण चिडून पुटपुटला.
दुसऱ्या दिवशी शेजाऱ्याला श्वसनाचा त्रास होऊ लागला म्हणून ऍडमिट करायला ते दोघे घेऊन गेले.
हॉस्पिटलमध्ये अम्ब्युलन्स पोचली तेव्हा एकजण व्हीलचेयर आणि ऑक्सिजन सिलेंडर घेऊनच त्यांची वाट पाहत होता.
"अरे तुम्ही....?? काल स्मशानात आला होतात. तीन तास लागतील म्हणून परत निघून गेलात..." न राहवून त्यातील एकाने विचारले .
"हो मीच तो ...काल माझे वडील वारले. त्यांना घेऊनच गेलो होतो. पण तिथे तीन तास वाट पाहण्यापेक्षा इथे कोणाचा तरी जीव वाचवणे महत्वाचे वाटले मला. ह्या हॉस्पिटलमध्ये वॉर्डबॉय आहे मी ... "असे म्हणून पेशंटला व्हीलचेयर बसवून आत शिरला.
© श्री. किरण कृष्णा बोरकर
No comments:
Post a Comment