कन्नूर स्वाड

Kannur Squad

कन्नूर स्वाड

केरळ पोलिसांची कन्नूर स्वाड नावाचे स्वतंत्र युनिट आहे.ज्यात फक्त चार ऑफिसर आहेत.जॉर्ज मार्टिन त्याचा लीडर.

त्यांच्याकडे आलेली प्रत्येक केस त्यांनी कमीतकमी दिवसात यशस्वीपणे सोडवली आहे.पण एक दिवशी त्याच्या स्वाडमधील एका ऑफिसरवर लाच घेतल्याचा आरोप होतो आणि ते युनिट बरखास्त केले जाते.

कासारगोड शहरात एका अनिवासी भारतीय अब्दुल वहाबची हत्या होते. खुनी त्याच्या घरातून कॅश आणि दागिने लुटून नेतात. त्या आधी त्याच्या मुलीला ,मुलाला आणि पत्नीलाही बेदम मारहाण करतात.पोलिसांकडे काहीही पुरावा नसतो. त्यात राजकीय दबाव ही वाढत असतो.

कासारगोडचा एसपी मनू निधी पुन्हा कन्नूर स्वाडला बोलावतो. मला माझी पूर्ण टीम पाहिजे या अटीवरच जॉर्ज मार्टिन ही केस स्वीकारतो.मनू निधी त्याला फक्त दहा दिवसांत केस सोडविण्याची ऑर्डर देतो.जॉर्ज हे आव्हान स्वीकारतो आणि खुन्याच्या मागावर निघतो.

हा  केवळ  एक वेगवान पोलीस तपास नाहीय तर त्यामागे पोलिसांचे कष्ट, त्यांना तपासात येणाऱ्या अडचणी.लाल फितीचा कारभार ,प्रशासकीय अडचणी या सर्व गोष्टींचा प्रवास आहे.

कन्नूर स्वाड आपल्या वैयक्तिक अडचणी दूर सारून दहा दिवस आपल्या जीपसोबत 3000 किलोमीटर चा प्रवास करीत खुन्यांच्या मागावर आहे.त्यांच्याकडे पुरेसे पैसे नाहीत.ते रस्स्यावर आंघोळ करतात .मिळेल ते खातात. पण आपल्या कार्याशी प्रामाणिक आहेत.तरीही त्यांचे वरिष्ठ त्यांना भारत टूर करतायत असा आरोप करतात.

आपणही नकळत त्यांच्यासोबत प्रवासात गुंतून जातो.

यात ममूटीने जॉर्ज मार्टिनच्या भूमिकेत प्राण ओतले आहेत.त्याचा आत्मविश्वास आपल्या सहकार्यांना सांभाळून घेणे.त्यांच्यासाठी जीव धोक्यात घालणे हे बघण्यासारखे आहे.एका क्षणी तोही निराश आणि हतबल होतो.

आपल्याला हा थरार अनुभवायचा असेल तर हॉटस्टारवर कन्नूर स्वाड नक्की पहा.हिंदी भाषेत आहे.