दोबारा

दोबारा ( 2:12 )

Do baa raa

साल 1996 

स्थळ .हिंजेवाडी पुणे 

त्या रात्री खूप मोठे वादळ चालू होते.जवळजवळ तीन दिवस हे वादळ चालेल असा हवामानखात्याचा अंदाज होता.

अनय बारा वर्षाचा मुलगा त्या कॉलनीतील एका बंगल्यात आईसोबत राहतोय.त्याची आई आर्किटेक्टर आहे.पुण्यातील एका मोठ्या हॉस्पिटलचे डिझाइन ती करतेय.अनय व्हिडिओ कॅमेराद्वारे स्वतःच्या आणि वडिलांच्या मेमरी रेकॉर्ड करून टीव्हीवर पाहत असतो.तो स्वतःचे रेकॉर्डिंगही करतो.

त्या रात्री तो आपला व्हिडिओ रेकॉर्डर चालू करून टीव्हीवर बघत असताना शेजारच्या बंगल्यातून झटापटीचा आवाज येतो.

कुतूहलाने तो खिडकीतून पाहतो तेव्हा दोन व्यक्तींची झटापट चालू असते. इतक्यात लाईट जाते. तो बॅटरी घेऊन त्या बंगल्यात जातो तेव्हा तिथे खून झालेला असतो . खुनी अनयला पाहतो आणि मागे लागतो. अनय धावत बंगल्याबाहेर पडतो त्याचवेळी फायरबिग्रेडची गाडी त्याला उडवते आणि त्याचा मृत्यू होतो.त्यावेळी घड्याळात रात्रीचे दोन वाजून बारा मिनिटे झालेली असतात.

काही वर्षे उलटून गेलीत. ते हॉस्पिटल पूर्ण झालंय. त्या हॉस्पिटलमध्ये नर्स असणाऱ्या अंतरा अवस्थीने तो बंगला घेतलाय.ती नवरा विकास आणि सहा वर्षाची मुलगी अवंती सोबत राहायला आलीय.

 तिला अनय आणि खुनाची गोष्ट कळते.बंगला साफ करताना तेथे तिला तो टीव्ही आणि व्हिडिओ रेकॉर्डर सापडतो.त्या दिवशी ही वादळी रात्र आहे. रात्री झोप येत नाही म्हणून कुतूहलाने ती टीव्ही आणि व्हिडिओ रेकॉर्डर सुरू करते आणि टीव्हीत अनय दिसतो.

अनय तिला पाहतो आणि तिच्याशी बोलू लागतो .तीही त्याच्याशी बोलू लागते अचानक बाजूच्या बंगल्यात काही झटापट चालू आहे असे अनय तिला सांगतो .ती त्याला तिथे जाऊ नये असे  ओरडून सांगते पण तो तिथे जातो .तिथे एका स्त्रीचे प्रेत पडलेले असते.अनय ते पाहून पळतो त्याचवेळी लाईट जाते.बंगल्याच्या बाहेर येताच फायरबिग्रेडची गाडी अनयच्या समोरून जाते.तेव्हा दोन वाजून बारा मिनिटे झालेली असतात.

सकाळी अंतराला जाग येते तेव्हा ती दुसऱ्याच बंगल्यात असते. हॉस्पिटलमध्ये जाते तेव्हा सगळे तिला सर्जन समजत असतात.ती आपल्या मुलीला आणायला स्विमिंग क्लबला जाते.पण तिथे अवंती अवस्थी नावाची कोणीच मुलगी क्लबमध्ये नाहीय असे सांगितले जाते.

ती आपल्या नवऱ्याला विकासला भेटायला हॉटेलला जाते पण तो तिला ओळखायला नकार देतो. उलट तुम्ही डॉक्टर अंतरा वशिष्ट आहात आणि तुम्ही माझे ऑपरेशन केले होते असे सांगतो.तिचे वरिष्ठ डॉक्टरही ती डॉ.अंतरा वशिष्ठ आहे असे सांगतात. डिसीपी आनंद तिच्यावर विश्वास ठेवून अवंतीचा शोध घेण्याचा प्रयत्न करतो .

हा काय प्रकार आहे ? अंतरा नक्की कोण आहे  ? खरोखर तिला मुलगी आहे का ?? 1996 साली अपघातात मृत्यू पावलेला अनय अजून जिवंत आहे ?? डोके चक्रावून टाकणारा हा चित्रपट नेटफ्लिक्सवर हिंदी भाषेत आहेत.

तापसी पनू  अंतरा अवस्थी आणि डॉ अंतरा वशिष्ठ च्या भूमिकेत आहे.अनुराग कश्यपचे दिग्दर्शन आहे.