अधुरा

अधुरा

ADHURA

काही वेब सिरीज /चित्रपट असे असतात की संपूर्ण पाहिल्याशिवाय आपण जागेवरून उठू शकत नाही.प्रत्येक भागानंतर पुढे काय होईल याची उत्सुकता ताणून धरते.अशीच ही एक सिरीज अधुरा 

निलगिरी वॅली स्कूल ही देशातील सर्वोत्तम शाळा समजली जाते. निसर्गाच्या कुशीत उंच थंड हवेच्या ठिकाणी ही शाळा आहे.या शाळेत शिकलेले विद्यार्थी आज जगाच्या कानोकोपऱ्यात यशस्वी व्यक्ती म्हणून नावाजल्या जातात.

लवकरच 2007 साली उत्तीर्ण झालेल्या विद्यार्थ्यांची रियुनियन या शाळेत होणार आहे. त्याच्या काही दिवस आधीच वेदांत  तिथे ऍडमिशन घेतो.वेदांत थोडा अबोल आहे.स्वतःच्या कोषात राहणारा. त्याला इतर मुले त्रास देतात. शाळेचा डीनही त्याला त्रासलेला आहे पण मानसोपचारतज्ञ  सुप्रिया त्याला सतत सपोर्ट करते.

2007 च्या रियुनियनमध्ये अधिराज अमेरिकेतून आलाय.तर देव त्या शाळेचा ट्रस्टी आहे आणि राजकारणीसुद्धा .त्याची बायको मालविका ही अधिराजची पूर्वीची प्रेमिका .सुयश मोठा टीव्ही स्टार आहे .हे सर्व मित्र पंधरा वर्षांनी एकत्र येतात .

पण अधिराजचा मित्र निनाद यात नाहीय.चौकशी करताना अधिराजला समजते की तो शाळेच्या शेवटच्या दिवशी गायब झालाय तेव्हापासून त्याचा पत्ता कोणालाच नाहीय.

रियुनियनच्या काही दिवस आधीच डीन व्यासचा मृत्यू होतो. तो नैसर्गिक मृत्यू नाही असे एक शिक्षक सतत सांगतोय पण त्याच्याकडे कोण लक्ष देत नाहीय.

रियुनियन सुरू झाल्यापासून विचित्र घटना घडत जातात. सुयश आणि अजून एका मित्राचा मृत्यू होतो.

निनादच्या गायब होण्यामागे एक रहस्य दडले आहे आणि छोट्या वेदांतचा याच्याशी काहीतरी संबंध आहे असा संशय अधिराजला येतो आणि तो छडा लावायचा प्रयत्न करतो.

कुठे आहे निनाद ?

वेदांत कोण आहे ?

प्रत्येक भागात या रहस्याचे कोडे एक एक करत सुटत जाते.

प्राईम विडिओवर ही सिरीज हिंदीमध्ये आहे .

अतिशय वेगवान ,भीतीदायक ,अंगावर काटा आणणारी सिरीज आपल्याला पूर्ण पाहून झाल्याशिवाय जागेवरून उठवणार नाही .