द फिस्टफुल ऑफ डॉलर्स 1964
दिग्दर्शक सर्जीओ लिओनच्या डॉलर्स ट्रीलॉजीमधील पहिला चित्रपट . यानंतर आलेल्या फॉर फ्यू डॉलर्स मोर आणि द गुड द बॅड अँड द अग्लि हे चित्रपट खूप गाजले.
क्लिंट इस्टवूडचा हिरो म्हणून पहिला चित्रपट. या चित्रपटाने त्याला काऊबॉयची अजरामर इमेज मिळवून दिली . त्याची हॅट ..ओठांच्या कोपऱ्यात छोटी सिगार ठेवून पुटपुटणे, खुरटी दाढी ,थंडगार नजर ,सहज घोडदौड आणि मुख्य म्हणजे विजेच्या वेगाने कमरेवरच्या होस्टरमधून रिव्हॉल्वर काढून गोळ्या झाडणे हे फक्त त्यालाच जमू शकते.
पार्श्वसंगीत हा या तिन्ही चित्रपटांचा प्राण आहे .विशेषतः द गुड द बॅड अँड द अग्लि या चित्रपटाची थीम तर जगप्रसिद्ध आहे . आजही ती कॉलर ट्यून म्हणून अनेकांच्या मोबाईल मध्ये आहे .
हा पहिला चित्रपट विशेष प्रसिद्ध नाही .मेक्सिको आणि अमेरिकेच्या बॉर्डरवर असलेल्या छोट्या गावात एक अनोळखी काऊबॉय येतो . अतिशय शांत स्वभावाचा हा काऊबॉय एक उत्कृष्ट गनफायटर आहे . आल्या आल्या तो चौघांना गोळ्या घालून ठार मारतो.
पण तिथे दोन तस्करी टोळ्या आहेत . सोन्याच्या तस्करीत ते नेहमी एकमेकांवर कुरघोडी करत असतात . पोलिसांच्या ताब्यातील एक सोन्याचा साठा त्यातील एक टोळी पळवते आणि दुसरी त्यांच्या मागे लागते . या दोन्ही टोळ्यांना आपसात भिडवून तो गनफायटर आपला आणि गावाचा फायदा करून देतो .
चित्रपटात फारशी हाणामारी नाही पण संपूर्ण चित्रपट आपल्याला गुंतवून ठेवतो .
No comments:
Post a Comment