मुंबईकर आणि कोरोना ..१

मुंबईकर आणि कोरोना....१

आयच्या xx या चीनच्या ... वाट लावून टाकलीय सगळ्यांची .घरी बसवून ठेवलंय सगळ्या देशाला .तरी नशीब ते फॉरेनर्स दिवाळीच्या आधीच कंपनीत येऊन गेले .नाहीतर आता माझ्या हातावर  होम कॉरेंटईनचा शिक्का बसला असता आणि आख्खी बिल्डिंग माझ्यानावाने बोंब मारीत रिकामी झाली असती.त्यांची सेवा करायला ही मीच भेटलो म्हणा.....का..?? तर नवीन मशिनरी माझ्या डिपार्टमेंट मध्ये लावणार होतो ना .... ?? तुम्हाला सांगतो.. अजूनही आपण या परदेशी लोकांना खूपच डोक्यावर बसवून ठेवले आहे. त्या दिवशी त्यांच्या सिगारेट संपल्या म्हणून मला आणायला सांगितल्या त्यांनी .... मला .. या कोकणी माणसाला ....??  अरे तुमची गुलामी करण्यासाठी हा माणूस कोकणातून इथे आला नाही .चांगली दीड एकर शेती आहे माझी . नोकरीवर लाथ मारून गावी जाईन केव्हाही ...शेवटी किसन पाटील कडून विड्याचे बंडल घेऊन त्यांना दिले आणि सांगितले try new brand .. दोन दम मारताच खुश झाले . जाईपर्यंत विड्याच पीत होते . किसनचे पण भले झाले ..

तर मी काय बोलत होतो त्या चिन्यांनी कोरोना विषाणू आणला आणि आख्ख्या जगाची वाट लावली .जगाची जाऊ द्या हो पण आमच्या मुंबईची वाट लागली त्याचे काय ....?? लोकल बंद ...... अरे स्वप्नातही विचार करू शकत नाही मी ... हा आता कधी कधी 8.40 रद्द होते पण 8.44 असते ना .. तितके ऍडजस्ट करतो हो आम्ही .पण संपूर्ण लोकल बंद .... तेही 21 दिवस ...

विमानसेवाही बंद केली म्हणता... त्याने मला काय फरक पडतोय हो.. मी काय रोज रोज  विमानाने जातो का ....?? मी चाकरमानी  लोकलने प्रवास करणारा आणि ती ही चौथी सीट ... तुम्हाला सांगतो नऊ ची ड्युटी आहे माझी पण पंच 9.12 ते 9.13 च असतो . साहेब टपून बसलेत कधी ह्याचा 9.16 ला पंच होईल . पण आमच्या लोकलने कधीच मला दगा दिला नाही .

आता लोकल बंद म्हणजे देशपांडेकडून फुकट वाचायला मिळणारा सामना बंद.. सावंतच्या डब्यातील भजी पराठे बंद ... तर स्वामींच्या राजकारणावरील चर्चा ही बंद .ते सोडा ... स्टेशन मधून बाहेर पडताना समोरून हसत येणारी गोखले बाई ही दिसायची बंद ....देवा  कसली ही शिक्षा देतोय आम्हाला...

आता हे वीस दिवस घरी राहून करू काय .....?? आधीच सुट्टी घ्यायची सवय नाही . घराबाहेर थोडे जास्त फ्री असतो हो आपण . आणि काही करायचे असेल तर ऑफिसच्या नावाखाली खपून जाते .म्हणजे आता त्या दिवशीचेच बघा ना ... प्रल्हाद मोरेने आजोबा झाल्याची पार्टी दिली .एक दिवस आणि रात्र अलिबागला रिसॉर्ट बुक केले. घरी सांगितले असते तर किती हंगामा झाला असता... आहो युद्धच ... मग काय इन्स्पेशनचे  कारण सांगून पार्टीला गेलो .घरची काही कामे ही ऑन ड्युटी करता येतात .मागच्या महिन्यात समीर दादांच्या पोराचे लग्न ऑन ड्युटीच अटेंड केले होते . बँकेची कामे ही होतात . 

आजच पहिला दिवस आहे लॉकडाउनचा .. कालच पोरांना दम दिलाय बाहेर गेलात तर तंगड्या तोडून ठेवीन . पण त्यांनी माझ्याकडे विचित्र नजरेने का पाहिले तेच समजत नाही . रात्री झोपताना सौ. म्हणाली ती घरातच असतात मोबाईलवर तुम्हीच उकिरडे फुंकत असतात. च्यायला हे असं होय ...बघतोच उद्या..

© श्री. किरण कृष्णा बोरकर