लॉकडाऊन नंतर ...१

लॉकडाऊन नंतर ..१

स्थळ.... मुंबईतील एक मध्यमवर्गीय वस्ती 

शंकर सुर्वे नेहमीप्रमाणे उशिराच घरी आला . लॉकडाऊन संपल्यावर त्याचे घरी उशिरा येणे चालू झाले होते.

अडीज महिने लॉकडावूनचे दिवस त्याच्या दृष्टीने भयानक होते . बायकोने सर्वांना धीर देऊन मिळेल त्या साधनात घर चालविले होते.

 आता त्याची पाळी होती . आज तो घरात शिरला तेव्हा मुलं जागीच होती . काहीतरी ऐकावे लागणार हे तो समजून गेला.

"ओ बाबा .. ह्या वर्षी गणपतीत जाऊचाना  गावात ...?? मोठ्याने विचारले.

"दरवर्षी जाताव.. मग नवीन काय ..?? छोटी म्हणाली."बाबांनी तिकीट काढलान की नाय ..?? नायतर दरवर्षी गर्दीत घुसून जाताव. माझे पाय आणि कंबर दोन दिवस दुकतत.

".या वर्षी गणपतीत गावी जाऊचा नाय.आपलो गणपती हयच..." शंकर शांतपणे म्हणाला.

 तसे बायको आणि पोराने चमकून त्याच्याकडे पाहिले.

 त्याने मुलीला जवळ घेतले.

" अडीज महिने घरात बसून होतो.कंपनी बंद . तरीही कंपनीने पगार दिला.संकटकाळी आपल्या मागे उभी राहिली . आज कंपनीला नुकसानीतुन बाहेर काढायचे आहे . त्यासाठी आम्ही चार तास जास्त काम करतोय तो ही विना मोबदला . आम्ही फक्त कष्ट करू शकतो आणि तेच करतोय कंपनीसाठी . अश्यावेळी पुन्हा सुट्टी घेऊन गावी जाणे मनाला पटत नाही . इतकी वर्षे गणपतीला जातोय . एक वर्ष नाही गेलो तर देव रागावणार नाही .  पुढचे वर्ष आहेच की . पण आज जे आपल्याला पोळी भाजी देतात त्यांना आमची गरज आहे . माझे ठीक आहे पण कंपनीत असे कितीतरी कामगार रोजंदारीवर काम करतात . त्यांना तर पैसे मिळालेच नाही . म्हणून आम्ही काही मित्रांनी बाहेरची कामे घेतली आहेत .  सुट्टीच्या दिवशी बाहेर मिळतील ती कामे करून येणारा पैसा त्यांना देणार आहोत . शेवटी गेली अनेक वर्षे आमच्या सोबत काम करतात" शंकर भावुक होऊन म्हणाला.

"ठीक आहे बाबा ... या वर्षी आम्हाला गणपती ..दिवाळीत कपडे नको . तेच पैसे त्यांच्यासाठी वापरा..".मुलगा म्हणाला.

"उद्या सकाळीच सुदामभाऊना फोन लावून सांगा यावर्षी आमाक जमुचा नाय. त्यापेक्षा चार गोणी तांदूळ जास्त पाठवा .. हयसर गरिबांक वाटू..आपल्या गरजेक जे उपयोगी पडले त्यांका देऊन नको काय ..", बायको म्हणाली.

दुसऱ्या दिवशी शंकर कामावर हजर झाला . त्याला पाहतच मी म्हणालो.." शंकर शेठ.. गणपतीला जाणार ना यावर्षी . सुट्टी टाका  पटकन .."

"साहेब यावर्षी सुट्टी नको .त्यापेक्षा आपला कॉन्ट्रॅक्टवर काम करणाऱ्या अंबादासला सुट्टी द्या .  तो गणपती छान  रंगवतो . त्याचे काम मी करेन . बिचाऱ्याचे जास्त पैसे सुटतील...".शंकर हात जोडून म्हणाला .

मी हसत हसत त्याच्या खांद्यावर थाप मारली .

© श्री. किरण कृष्णा बोरकर